渝味曉宇重慶老火鍋 (太子集團中心) (Closed)

有朋友約我中午打邊爐，原來我真係未試過喺中午食火鍋，，因為上次覺得幾好食所以約朋友去尖沙咀分店試吓，尖沙咀可以望到小小對面維港嘅海景，景色優美，中午食火爐客人比晚上少好多，坐得比較鬆動。今次點蕃茄湯同香西皮蛋湯底，都係唔辣嘅湯底。上次十大必點有幾個都冇試過，所以今次特登點幾個嚟試吓。安格斯肥牛、稻田毛肚、鮮黃喉、重慶耗兒魚及現炸豆皮等。安格斯肥牛同羊肉水準穩定。稻田毛肚同鮮黃喉如果跟指示煮2分鐘，我覺得比較老，所以之後試咗1分鐘左右或者見到捲曲（即小小熟）時便拿起，食的口感會比較好。血旺即是豬紅，但佢哋嘅切法似鴨血，所以食落個口感同豬紅都有少少分別。海白菜其實唔係白菜，似海蜇，煮完後有啲爽脆，口感特別。炸豆皮同炸腐竹差不多，但比較薄身同煙韌。重慶耗兒魚係我今次最欣賞嘅食材，煮左10分鐘後，魚肉仍然好嫩滑，又冇乜魚骨，好鮮甜。