野川拉麵の深燒食堂

Open Now

Now Closed

今日探訪一間隱世日本餐廳，見到餐牌好似食放題咁多款式，所以幾個人share食，叫咗勁多嘢食。首先叫咗小食，香蒜牛油芝士流心蛋粟米，呢個小食係將牛油粟米放喺錫紙兜入邊，上面鋪咗芝士，在窩隻雞蛋上去，然後喺焗爐焗熟，幾特別。第二味係芝士薯波配芝士醬，芝士薯波炸到脆卜卜，入面芝士鹹鹹地，薯蓉好軟滑，好味。之後有串燒豬頸肉、串燒牛舌，牛舌厚切，内裏好軟滑。芝麻雞全翼，大大隻、好脆口。椒鹽雞軟骨，細細粒、脆卜卜，夠惹味。吉列炸蠔，外脆內軟，蠔入邊好juicy, 好有鮮味。軟殼蟹天婦羅，好大隻，雖然蟹膏唔多，但係炸到脆卜卜，好好味。油甘魚壽司、鰻魚壽司、火炙三文魚壽司，全部都好新鮮。主食叫左牛肉壽喜燒，唔會太肥，嫩滑有牛味，牛肉同蔬菜都好多，份量好大，好足料。仲有豬軟骨拉麵豬骨湯底，湯底好濃味，分量充足，好大碗。芝士奶蓋，碎朱古力咖啡沙冰，飲品好巨型，好冰凍，好香濃，超重奶味，正。綠茶雪糕配芝士蛋糕，芝士蛋糕都係綠茶味，好特別。