Video
Read full review
2025-07-05
422 views
放假日老婆大人又同我去食好嘢！呢餐去咗米芝蓮中菜廳食佢哋嘅經典招牌菜正到痹啊。呢晚就係去港島香格里拉酒店嘅夏宮，佢哋推出咗冇耐嘅精選菜單套餐。啲裝修都幾經典用紅色金色相襯，加埋高樓底同埋水晶吊燈真係好有氣派。坐低侍應就送嚟一杯迎賓飲品玫瑰花茶！香香嘅玫瑰花味好清新老婆大人勁鍾意。我哋食呢個4位嘅精選套餐連埋加一 $4048仲有一支紅酒送！呢支紅酒入口好順滑而且好有果香，用嚟配比較濃味嘅中菜好啱key。首先上枱嘅係前菜拼盤，聽聞三款都係餐廳嘅受歡迎前菜。脆皮燒腩仔真係做到皮脆肉嫩，一層一層嘅肉質真係令人食得好滿足。跟住呢個係井岡山豆腐皮，原來呢個井岡山豆腐皮好出名，食落去好多汁水味道香辣真係好惹味。最後呢個係燒汁醬雜菌荔芋盒！呢個芋角真係炸得好鬼酥脆仲要一啲都唔油，入面嘅雜菌用燒汁醬煮到入晒味，加埋黑魚子就食得更加招積。香口嘢唔好俾佢停！繼續嚟呢個係松露醬鳳尾蝦多士，大大隻鮮蝦瞓喺香脆嘅多士上面，加埋黑松露醬嘅菌味食完真係齒頰留香。呢個骨香紫蘇薑米多寶球個賣相好鬼吸引！多寶魚起晒肉嚟炒球食落去超級方便嫩滑又好味，剩低嘅魚骨師傅仲將佢炸到又香又脆，真係好食到連骨都可以吞埋。呢個餐有一隻嘅北
放假日老婆大人又同我去食好嘢！呢餐去咗米芝蓮中菜廳食佢哋嘅經典招牌菜正到痹啊。呢晚就係去港島香格里拉酒店嘅夏宮，佢哋推出咗冇耐嘅精選菜單套餐。
啲裝修都幾經典用紅色金色相襯，加埋高樓底同埋水晶吊燈真係好有氣派。
坐低侍應就送嚟一杯迎賓飲品玫瑰花茶！香香嘅玫瑰花味好清新老婆大人勁鍾意。
我哋食呢個4位嘅精選套餐連埋加一 $4048仲有一支紅酒送！呢支紅酒入口好順滑而且好有果香，用嚟配比較濃味嘅中菜好啱key。
首先上枱嘅係前菜拼盤，聽聞三款都係餐廳嘅受歡迎前菜。
脆皮燒腩仔真係做到皮脆肉嫩，一層一層嘅肉質真係令人食得好滿足。
跟住呢個係井岡山豆腐皮，原來呢個井岡山豆腐皮好出名，食落去好多汁水味道香辣真係好惹味。
最後呢個係燒汁醬雜菌荔芋盒！呢個芋角真係炸得好鬼酥脆仲要一啲都唔油，入面嘅雜菌用燒汁醬煮到入晒味，加埋黑魚子就食得更加招積。
香口嘢唔好俾佢停！繼續嚟呢個係松露醬鳳尾蝦多士，大大隻鮮蝦瞓喺香脆嘅多士上面，加埋黑松露醬嘅菌味食完真係齒頰留香。
呢個骨香紫蘇薑米多寶球個賣相好鬼吸引！多寶魚起晒肉嚟炒球食落去超級方便嫩滑又好味，剩低嘅魚骨師傅仲將佢炸到又香又脆，真係好食到連骨都可以吞埋。
呢個餐有一隻嘅北京片皮鴨！仲要係燒完出嚟喺客人面前即刻片夠晒新鮮熱辣。
服務員足足片咗兩碟有皮有肉嘅片皮鴨，用軟熟嘅麼麼皮加埋靈魂配料醬汁一齊食夠晒和味。
食咗咁多邪惡嘢送嚟呢碟松子上素鬆時間啱啱好！入面有好多次細粒粒嘅馬蹄、蘆筍、甘筍同埋菇粒，用勁脆嘅生菜載住嚟一齊食清甜多汁又健康。
最後仲有雪菜火鴨絲竹昇麵保證一定食到飽飽！竹昇麵超級爽口彈牙而且冇鹼水味，加埋惹味嘅雪菜同埋嫩滑嘅火鴨絲真係好食到無敵。
呢個餐仲有香芒楊枝甘露做甜品！材料十足有果味甜度啱啱好真係好好味喎。
老婆大人嗰日喉嚨好唔舒服！朋友竟然話俾呢度有龜苓膏食，即刻叫一個俾老婆大人試吓，真係好甘香食到真材實料嘅味道，雖然要$160但係我覺得物有所值。
Post
