黑門水產すいさん (棉登徑)

幾經辛苦終於book到呢間餐廳，勁多人，預約再加埋walkin，成堆人係門口等！黎到一定要試下啲燒海鮮。海苔磯燒岩手縣生蠔同 蟹蒜磯燒岩手騌生蠔，兩款唔同嘅味道各具特色，完全唔會遮過咗蠔嘅鮮味，海苔咸香，蟹蒜鮮香。而海膽燒帆立貝更令我眼前一亮！估唔到呢兩隻海鮮，原來咁夾，兩種海鮮嘅味道互相配合，令到帆立貝食落去令人覺得更香口！重頭戲一定係呢個甲羅燒，其他舖頭普遍都係俾你撈飯，蟹膏又唔夠多，到喉唔到肺，呢度就唔同，比兩塊梳打餅你，你可以啖啖都係蟹膏，十分滿足！食日本野又點可以無刺身？長崎池魚夠晒新鮮，食之餘仲可以欣賞到師傅刀功，每塊都切得剛剛好，入口一咬即呑。當然要食返啲澱粉，黑門三文魚加州反卷同鐵火卷，麻雀雖小，但用料十足，每一啖都係魚生同其他配料，再加上飯既組合，飽肚得來又唔會太多。同朋友分別點左兩杯嘢飲，海底之心同寄異果梳打，每道菜之間飲一啖清一清口腔，係新鮮嘅感覺，為迎接下一道菜式做好準備。