面譜-京川料理 (Closed)

每到冬天就最容易手凍腳凍，呢個天氣當然最適合食麻辣川菜，暖胃之餘，仲令全身每個血液細胞滾動起嚟﹗先不論食物，但呢間餐廳嘅裝潢已經非常吸引，充滿住濃厚嘅中國特色，一個個大型京劇面譜高掛天花，有型又有格。今晚得兩人共餐，只試了三道菜，但已經食到好好好飽。首先係菇粒螺肉粉皮，微辣帶甜，並沒有平時食的花椒香麻味，而佢嘅粉皮比一般的彈牙好多，面頭的螺肉菇粒切得好細，很有嚼頭，伴埋一齊食VERY GOOD~做開胃小菜相當出色。為咗試真正嘅川菜味道，接住就點咗水煮牛試試。一大盤橙紅色水煮牛，見到都有D驚，裡面有各種各樣嘅配料，有荳菜、芹菜、花椒、大蒜、辣椒......喺最底層嘅粉皮更係精華所在，吸滿香料湯汁，辣得相當刺激，愈食愈上癮。相當起嚟，我覺得牛嘅肉質同一般茶記食嘅差唔多，放太多生粉，口感一般。最後一道菜就係龍婆婆菊花魚，整條魚已去骨，魚肉起成花瓣狀，功夫考究。魚肉外層炸得香口，而內里肉質仍能保持鮮嫩，加上酸甜香辣嘅醬汁認真讚﹗﹗﹗呢杯特飲嗰名好有意境，叫紅樓夢，應該是士多啤梨加上野莓汁，味道酸酸甜甜，好有戀愛感覺~~總括而言，呢間餐廳質素唔錯，幾有驚喜