天鴻燒鵝飯店

Open Now

Now Closed

幾年前,聽一個住呢度附近中學舊同學話,呢間鋪燒鵝非常好味,但因為我近年口味轉淡,所以甚少食燒味。但因為太耐冇食過燒味,而且我年邁母親鍾意食雞,所以就帶佢老人家去試下。但係今次我兩母子都冇試燒鵝,我為老媽子叫【豉油雞飯+凍好立克$23】,而我自己就叫【燒肉切雞飯+凍奶茶$25】,阿姐幫我落單時,因阿姐聽唔清楚,繼而我要多次向阿姐,確認我自己係要【燒肉切雞飯】。但之後我果碗飯,最終都係俾錯我【燒肉豉油雞飯】。算啦! 心諗可能唔關阿姐事,可能係師傅睇題單呢...照食!我見兩大碗飯雖然用膠碗裝,但係同碟頭裝份量一樣,飯淋有鮮甜豉油,飯面鋪上新鮮時菜,菜上面鋪上份量唔少燒味。【燒肉】係【燒腩肉】,皮脆肉唔肥又唔太鹹,【豉油雞】皮薄肉厚,食落口充斥滿香蜜糖味,豉油又係唔太鹹。我老媽子猛讚好味道,成七十五有多咁大年紀,成大碗飯連肉都食哂...勁!我見隔離幾客,大多都叫【燒鵝飯】食,照之前食評話齋,客人叫【燒鵝飯】,竟然有燒鵝脾,廿零蚊有燒鵝脾食真抵。我下次一定要再幫襯,一試呢度馳名【燒鵝】。補充:『呢度一隻燒鵝$188元』,比深井最少$230元一隻抵好多~