CHEF STAGE de Eddy Chu (Closed)

男朋友份人冇乜情調，叫佢諗食乜成日都話唔知同你鍾意，估唔到半年紀念呢一日，搵到間有風格又有水準既餐廳同我慶祝。一早訂左位8:15既我地 8:10就到左，但最後見到人地遲過我地到反而早過我地入，我地就等到2x分先入得，奇怪的安排。不過好在我地有個窗口位，對正左海景望到維港，打和啦。我地一人揀左一個五道菜既Set，前菜同餐湯都係滿滿既黑松露味，對於男友呢個松露控就最開心。而個沙律都不過不失，唔差但亦無大驚喜。呢個時候睇到格離既人叫左二人套餐送上黎既海鮮拼盤十分吸引，我同男友都望到流晒口水，好後悔冇叫到呢個餐，一齊講話下次黎一定要試下呢個！到左主菜，我地分別叫左黃油雞扒配鮑魚同黑毛豬。鮑魚煮得好香，而且唔係細細隻既鮑魚，食得好滿足，雞扒就較肥，皮都較厚，我呢個唔食雞皮既人，男友就要一直幫我去皮lu，但雞肉都煮得好嫩，而且好入味。而黑毛豬都唔錯，香口得黎唔會膩，抵讚。最重要既就係最後既甜品啦！賣相非常靚，好濃既士多啤梨味，甜而不膩，搞到我細細啖咁食，好唔想佢食完！總括，呢一餐係物有所值，如果入座安排好一D就更完美了，下次會再番黎試下佢個好吸引既海鮮拼盤。