心之食堂 (Under Renovation)

同老公去親日本旅行都鍾意幫襯居酒屋，貪每碟份量唔太多，兩個人可以試多幾款，一邊嗒下啤酒，一邊食佐酒小食，所以喺香港我地都會發掘下d居酒屋，放工後去鬆一鬆。心之食堂食物選擇都唔算少，而且食親每樣都好食。有別於一般燈光昏暗嘅居酒屋，心之食堂比較光猛，坐得舒服。我地點左兩款卷物：彩虹卷同脆脆吞拿魚腩卷。彩虹卷入面有炸蝦、青瓜、牛油果，外層有飛魚籽之外仲有魚子醬，口感非常豐富。我最鍾意係呢個脆脆吞拿魚腩卷，上面嘅吞拿魚腩蓉入口即融，有魚油香味，加左天婦羅脆脆令到食落口感好有趣，墊底嘅沙律醬帶柚子味，好清新。心之蛋卷係另一推介，一切開，洶湧澎湃嘅芝士就流出黎，蛋卷入面有芝士，仲有吞拿魚碎，蛋煎得香又厚身，好味😋另外仲點左好適合佐酒嘅蒜片炒牛柳同日式煎餃子呢d香口野。牛柳肉質軟稔，非常入味👍🏻飯後果～原條燒菠蘿，呢個真係甜到爆燈！仲非常多汁，食完就滿足哂喇！