寶寶雞煲 (Moved) New Location

之前已經黎食過一次，上次食完雞煲，今次一早已經諗住試下個海鮮粥底火鍋，前一日去open rice 睇下有咩配料，就見到原來想食粥要提前預約，即刻打去預留好彩趕得切。我地兩個人配環球海鮮盤6款，有蝦、魚、象拔蚌、蜆、鮑魚等等。各樣海鮮都係新鮮的，蝦就美味甘甜、肉質爽口，蚌、蜆同鮑魚都好彈牙爽口又鮮嫩，魚更加一份嫩滑。呢個海鮮盤食得過。火鍋配料揀左6款，先講手切鮮牛肉，明顯係高質d，非常鮮嫩，油花都幾平均，一啲都唔"韌"，不過美國牛肉都唔差得幾多，都好食的。然後有日本黑豚肉，肉味香，同樣唔覺"韌"，都唔錯。左起係魚皮餃、午餐肉、手打鯪魚球。特別要提魚皮餃，魚皮有咬口，肉質好嫩滑，覺得好食過平時食個d。另外仲嗌左一碟手打陳皮鮮牛滑，唔算好嫩滑但又幾好食，好有陳皮味。另外值得一提既係個秘製醬料，味道調得幾好，有少許辣，為食物增添一份美味。最後係個粥，可以按個人喜好落幾多配料，有南瓜粒、芋頭粒、冬菇粒、芹菜、窩蛋。個粥清淡得黎有少許配料既味道，但如果啲水小翻d就更好。環境比較舊式，但都無阻啲人黎食佢，最緊要係食物好食。