福丸水產 鉄板燒 日本料理 (Closed)

重臨福丸, 今次唔係食浜燒, 而揀咗鐵板燒！同樣係以新鮮食材即燒即食, 鐵板燒不同在有得睇又有得食, 望住師傅嘅細心製作, 本來就已經係一場精彩嘅表演。前菜係簡單而美味嘅沙律, 醬汁不會太多, 啱我口味。大大隻車海老, 鮮甜爽口, 鮑魚嚼勁十足, 又唔會韌, 海產新鮮程度無庸置疑。銀鱈魚煎得啱啱好, 魚肉中心仍保持水份, 肉質纖維細緻, 嫩滑程度令人喜出望外！美國安格斯牛肉薄片, 輕輕煎到5成熟, 卷起蒜片同蔥花, 牛肉脂香混合蔥蒜, 惹味程度倍增！櫻花蝦炒飯香氣撲鼻, 炒得粒粒分明。剛食完炒飯, 喉嚨較乾, 飲返碗暖笠笠嘅味噌湯, 正合我意。最後當然唔少得甜品！黃豆粉黑糖雪糕, 冰涼順滑, 為整餐畫上完美句號。