添記法式三文治

Open Now

Now Closed

每次有朋友到香港我都會帶佢地周圍食香港地道好野，而添記總係我個 list 上面出現。添記已經屹立左唔知幾多個年頭，鋪頭細細貼滿唔同媒體既訪問。睇下 2005 年既報導，當時一個細法包只係賣 $15, 而家則賣 $33, 可見香港物價升左幾多。鋪內設有雜貨架賣各式醬料同食品，主要為涼果，如檸汁薑、九製芒果、話梅等等。添記越式法包之所以禁吸引我，除左價錢相宜之外，係因為麵包同餡料都絕對唔馬虎。係香港食過唔少法包，好多標榜話自己有幾脆，但事實係又硬又乾又唔好味，界到個口傷晒唔知為乜，而添記選用既法包，烘完之後屬鬆脆，唔硬又易咬，麵包唔特別香，不過做越式法包又唔怕佢唔香，因為餡料味重，有麵包中和都唔錯。落單之後老闆馬上烘法包，等幾分鐘就熟練地將餡料填入，有扎肉、嚼肉、腩肉、豬手肉、醃蘿蔔絲、青瓜等。下午茶的話，兩人分一個細法包就剛剛好。味道好正又複雜，有微辛引出食欲，幾種肉味加埋好香，酸酸甜甜既蔬菜中和肉既油膩，脆脆法包加埋繽紛既餡料，真係色香味俱全。食到最後先記得影相，真係唔好意思，今次唔係相機食先。