八幡屋涮涮鍋 (Closed)

旺角美食分享:今次介紹嘅係打邊爐好去處，呢一間八幡屋性價比都幾高，整體質素都覺得唔錯！C3 150分鐘刺身海鮮火鍋盛宴🫕當然要食咗呢個套餐主打嘅「澳洲M5 和牛」，和牛顏色粉嫩，咬落有濃郁嘅牛肉味，加上係薄薄地切成一片，好正！佢有3款牛肉，2款豚肉全部都係任食，可以大吃特吃！海鮮都有好多選擇，海蝦、帆立貝、廣島蠔、日本魷魚等等都有齊！海蝦彈牙之餘仲大隻！帆立貝都鮮甜好味！炸物炸得非常之好，唔會好重油膩感，仲要非常之香脆！自己最鍾意食佢哋嘅香芋圓，外脆內軟仲要好甜香芋味道！刺身都有成十幾款任食，超新鮮！辛辣泡菜湯唔會好辣，好有韓式風味，自己最鍾意加啲公仔麵落去一齊煮，有少少似部隊鍋嘅感覺！平時出面都好少見到性價比咁高嘅餐廳，價錢唔貴仲可以有得海鮮、刺身、火鍋、M5和牛任食，自己覺得呢間真係唔錯。