花月庭 (Closed)

今次係我第一次食下午茶自助餐，我一直以為下午茶自助餐應該只係得甜品同埋好少嘢食，但係經過今日食完之後發現原來係錯嘅。喺旺角帝京酒店入面，花月庭餐廳嘅下午茶自助餐只係得一段時間就係星期六，日及公眾假期嘅15:15-17:15，因為之後佢哋得45分鐘嚟清場同埋準備晚市自助餐，真係可以話爭分奪秒呀，用盡曬每段時間。而家用恆生咭埋單，喺加一服務費之後會有75折。我哋預先已經book咗枱，大約三點鐘嚟到餐廳門口見到已經排曬長龍，真係嚇咗一跳。最後大約15:21終於入到去被安排坐位，速度都算好快，佢地門口亦有職員排隊等候櫃檯職員安排邊張枱後就帶客人過去。經過攞嘢食嘅位置時已經見到好多人排緊隊等攞嘢食，感覺真係好誇張，完全唔覺得自己係食緊下午茶自助餐，而係食緊午餐或晚餐，我原本仲以為應該係好悠閒咁食。去攞嘢食嘅時候發現琳瑯滿目，差唔多應有盡有，只係除咗海產無。例如有麵當、刺身、飯、炸物、沙律、涼粉、豆腐花、甜品、雪糕、餐湯、餐包…等等。總之食完已經勁飽，唔洗再食晚餐。不過佢有樣係好特別嘅就係飲品corner原來係自成一角，就係一入門口嗰時嘅左手邊。