Video
Read full review
2009-12-14
27 views
喺"開飯"搜尋灣仔區美食, 發現咗呢間餐廳, 評語幾好, 決定一試.餐廳開喺商業大廈二樓, 環境整齊舒適, 感覺唔錯. 半自助餐$88(未計主菜), 包餐湯兩款, 海鮮自助吧, 沙律吧, 即叫即做pasta及甜品吧. 餐湯有意大利菜湯同椰菜花忌廉湯, 我揀咗前者, 味道比羅宋湯清一啲, 都幾好味. 海鮮自助吧有青口, 凍蝦, 翡翠螺同凍蟹, 唔見龍蝦仔. 四款海鮮都有唔錯水準, 幾新鮮, 拍得住好多酒店. 凍蝦同翡翠螺冇乜沙(八隻中只有一隻有), 青口亦算鮮嫩, 比起我上次去海景嘉福或海景萬麗都要好. 凍蟹雖然比較細隻, 但係有羔, 肉質結實鮮甜, 唔錯, 不過近八點冇再refill, 第一round唔食就會錯過.沙律吧有幾款現成沙律, 亦有配料及器具可自製凱撒沙律, 我揀咗後者. 三角豆, 粟米, 車厘茄, 生菜, 乾肉粒, 芝士粉......按自己口味撈勻, 正!由於睇咗幾個食家都話主菜分量足, 所以我同朋友兩個人只係叫咗一客鵝肝拼羊架. 鵝肝算大片, 不過煎得唔夠香, 欠缺外脆內軟嘅口感; 羊架有兩大件, 肉質軟硬適中, 廚師以簡單手法烹調, 冇落太多調味, 反而能食到肉
餐廳開喺商業大廈二樓, 環境整齊舒適, 感覺唔錯.
半自助餐$88(未計主菜), 包餐湯兩款, 海鮮自助吧, 沙律吧, 即叫即做pasta及甜品吧. 餐湯有意大利菜湯同椰菜花忌廉湯, 我揀咗前者, 味道比羅宋湯清一啲, 都幾好味.
海鮮自助吧有青口, 凍蝦, 翡翠螺同凍蟹, 唔見龍蝦仔. 四款海鮮都有唔錯水準, 幾新鮮, 拍得住好多酒店. 凍蝦同翡翠螺冇乜沙(八隻中只有一隻有), 青口亦算鮮嫩, 比起我上次去海景嘉福或海景萬麗都要好. 凍蟹雖然比較細隻, 但係有羔, 肉質結實鮮甜, 唔錯, 不過近八點冇再refill, 第一round唔食就會錯過.
沙律吧有幾款現成沙律, 亦有配料及器具可自製凱撒沙律, 我揀咗後者. 三角豆, 粟米, 車厘茄, 生菜, 乾肉粒, 芝士粉......按自己口味撈勻, 正!
由於睇咗幾個食家都話主菜分量足, 所以我同朋友兩個人只係叫咗一客鵝肝拼羊架. 鵝肝算大片, 不過煎得唔夠香, 欠缺外脆內軟嘅口感; 羊架有兩大件, 肉質軟硬適中, 廚師以簡單手法烹調, 冇落太多調味, 反而能食到肉嘅原味, 頗合我心意.
冇食pasta, 亦冇食熱盤, 反而試咗幾款甜品. 焦糖燉蛋幾好味, 不過部分唔夠"焦". Tiramisu面頭嘅可可粉稍為厚咗啲, 略帶苦, 但都唔錯, 只係少咗啲酒味. 芝士餅有純味同Marble cheese cake, 試咗前者, ok. 另外一款蛋白忌廉杯, 稍淡, 不及焦糖燉蛋. 整體嚟講, 甜品水準亦比得上好多中價酒店, 好有心機.
水果有西瓜, 哈密瓜, 火龍果同菠蘿, 全部原片上, 好新鮮. 另有四款雪糕, 牌子不詳, 屬大路口味, 沒有試到.
飲品有冷有熱, 最意想不到係有桂圓茶同生薑茶, 簡直令我感動.
呢餐晚餐食咗近兩個鐘, 一路食一路讚, 因為睇得出老闆同廚師都好有誠意, 喺選材同製作方面都好有心機. 服務亦算周到, 收碟同refill都快, 仲要免加一, 我真係有啲擔心老闆咁經營有冇得賺. 埋單找數$256, 畀埋小費都係$270(我覺得小費可以畀多少少, 不過朋友請客, 冇法), 人均消費$135, 兩個人捧住個肚好滿足, 不約而同話要推介畀朋友. 臨走前問經理開咗業幾耐, 佢話唔夠三個月. 我都希望佢生意好啲, 我下次再到灣仔時仲食得到.
Post