紅伶飯店

Open Now

Now Closed

位於佐敦不起眼嘅後街，裝修維持舊有風味，餐廳客人滿座。秋冬有推出限定羊腩煲，平時食唔到，啱晒呢個凍冰冰嘅天氣，兩個人叫左一個細煲盛惠 $398。睇落驚唔夠食，叫多個滷水什錦，一碟有齊不同鵝嘅不同內臟，適合貪心嘅我，滷味入味唔會太咸。鵝腸偏多而且唔肥，食幾多都唔怕，除左有大量鵝腸，仲有鵝肝，鵝腎，紅腸...主角羊腩煲，原來份量勁大，兩個人食都好夠。每舊羊腩都跟煙煙韌韌嘅皮，充足骨膠原！配料中馬蹄，支竹有齊，羊腩煲嘅材料缺一不可。最值得讚係腐乳醬，咸甜適中帶少少酒香，蘸羊肉一流。羊腩無肥膏，肉質依然炆得入味軟熟，食到一絲絲羊肉，值回票價！