金所 (Closed) View

最鍾意食烏冬，難得今次餐廳嘅主題係首次喺香港出現嘅白布烏冬，即刻走嚟試！星期六晚上6:30嚟到，已經有幾個客人等緊位，慢少少都有排等！等咗大概20分鐘就有位，座位唔算多，坐吧檯前都依然非常鬆動menu好簡單，只有熱湯烏冬，沾麵及凍烏冬，配搭鴨肉、雞肉、梅乾及天婦羅。所以好快就選定食乜，唔洗左諗右諗！鴨肉入熱湯白布烏冬 ($75)鴨肉連皮，咬落非常鬆化，比起平時食嗰啲硬到咬甩牙嘅鴨胸真係好得多。配料有茄子、大蔥，湯比沾麵嗰種清淡少少~ 而烏冬呢，由於浸晒喺湯入面，想拎佢出嚟影相係有啲難度，好難夾起！雞肉入沾白布烏冬 ($86)想影烏冬，叫呢款或者凍烏冬就好好多嘞！湯汁以海帶、鰹魚及醬油煮成，比熱湯重口味啲。有4件好juicy嘅雞肉，茄子及大蔥。本身我都唔係好鍾意食大蔥，但呢度嘅大蔥冇嗰種辛辣味道，食完都唔會成陣味留喺口腔之中。食到咁上下，加入薑茸及蔥粒，又有另一種味道。自家製白布烏冬賣相似雲吞皮，滑溜到不得了，厚薄適中，如果摺埋嚟咬更加顯得彈牙。聽隔離檯話食得好飽，但我想講，其實既得意又好味到唔夠喉！山藥 ($18)食咗一輪烏冬都仲未到嘅？原來係新鮮即磨㗎，加咗啲鰹魚汁令山藥更加有味道。