詠藜園四川菜館 (Moved) New Location

加人工請同事食飯，唔想行到飲茶了事，公司附近又冇乜好嘢食，於是訂枱食詠藜園。平時一條友食晏都會去，晏晝唔太多人，一條友易有位。今次一行13人，叫咗個10人餐，再加炒飯、小籠包、生煎包，有同事識食，當然仲有叫兩碗擔擔麵大家食。13個人個個食到飽飽，一路食一路讚好食，最令我意外係成班同事做咗十幾年，居然大部份同事都未嚟過！擔擔麵唔洗多介紹，嚟得呢度唔食真係損失。生煎包皮脆有肉汁，小籠包一般水準，因為同十人餐個過橋水餃比，始終水餃更出色，過橋啲辣油唔太辣，同水餃好夾。十人餐啲前菜唔錯，好夠味，一陣風就清曬。主食有樟茶鴨、松子魚同雲吞雞，當中雲吞雞啲湯真係一流，一個大砂窩上到枱仍然滾滾下，好甜又冇味精。另外仲有賽螃蟹、上湯白菜、饅頭回窩肉，賽螃蟹唔夠滑，但回窩肉中嘅饅頭真係一絕，回窩肉汁滲入炸饅頭，值得再食。另外豆漿都好正，香濃有質感。最後甜品嘅豌豆黃，淡淡豆香化曬之前濃烈味道，食完非常舒服。