御滿屋日本料理

Open Now

Now Closed

刺身拼盤，揀選咗三文魚，牡丹蝦，甜蝦，帶子同埋唔係好多地方有得食嘅蘭花蚌；三文魚入口肥美，牡丹蝦大隻之餘仲好新鮮，特別推介蘭花蚌，口感爽脆得嚟仲帶著淡淡既海洋鮮味。火炙左口魚壽司，一向都好喜歡左口魚被火炙之後嘅嗰一份油香，呢一樣嘢幾乎係每一次見到餐牌有嘅時候嘅必點項目，呢一間餐廳亦都無令到我失望，左口魚嘅油脂喺口入面爆發，感覺完美。黑松露油甘魚壽司，宜家放題啲壽司個賣相真係越嚟越似樣，唔講都以為去咗食omakase，油甘魚嘅甘香同黑松露味好襯。燒紐西蘭羊鞍，羊鞍羊味溫和，唔會話太過騷， 外皮燒得香脆之餘入面嘅羊肉仲係非常之嫩滑。串燒鰻魚，鰻魚相信係除左刺身之外，另一樣番本嘅食物，呢度嘅鰻魚肉身脹卜卜，同喺城市超級買嗰啲不遑多讓，抵食。古法支竹羊腩煲，依家連放題都有得食羊腩煲 雖則唔係新聞，但係能夠做到好似呢度咁樣，有大排檔咁嘅質素嘅就真係唔係間間都有，細細煲一煲有兩嚿羊幾舊荀同幾塊枝竹，啱啱好唔會驚食唔到其他嘢。最尾仲有一人一個嘅movenpick雪糕，為呢個放題畫上一個完美嘅句號。