彩

Open Now

Now Closed

彩係佢開冇耐我朋友帶我黎食過，果陣我未食過好味嘅沾麵，簡直覺得驚為天人，個濃蝦湯汁係橙紅色㗎！又濃又香，好杰，我平時好怕食拉麵舊叉燒，但佢整得又淋又好味，糖心蛋就好多都整得好食，但佢就可以個蛋黃全糖心，配一個黑椒麵，黑椒係研碎一粒粒咁佈滿麵條，總之係一試難忘！食多一兩次後，無啦啦就話執咗，好似有嘀人事糾紛...當時覺得相當可惜，你知啦！無得食就零捨掛住，又唔知有冇更加美化到碗麵，當我知道佢開返，又入開元朗緊係會一會佢啦！諗都冇諗就叫返濃蝦湯沾麵，不過麵底佢有個是日限定柚子喎！咁就轉黎試下啦！噫？！今次唔多對路喎，個湯底水咁多嘅，而且蝦味都冇咁濃，沾麵嘅湯應該比較杰身先掛到落嘀麵，但佢依家只係咸同普通湯咁，其實我係失望㗎，重叫咗幾個朋友陪我食，我重諗緊係咪我記錯呢？點知我朋友率先發聲，話個湯底水咗咁多，咁證明佢變咗！佢變咗啦！之後侍應哥哥過嚟問我地覺得好唔好食，我地都照直講，佢話師傅會因應天氣，好似依家比較熱同濕，做一嘀口感比較清爽嘅湯底，輕盈一嘀！師傅有性格，我呢嘀食慣重口味，一時三刻改唔到，下次都係凍嘀先再黎食啦！