Burgerism (Whampoa Estate) (Closed)

喺附近遊玩完畢，途經呢間餐廳，二人套餐$398，已包餐湯、頭盤、主菜、甜品和餐飲，相當實惠，於是決定光顧。餐廳環境唔錯，座位間距適中，坐得都幾舒服。服務員態度親切，值得一讚！落咗單，餐湯好快送上，係龍蝦湯，湯味頗濃，賣相精緻，唔錯！跟住上頭盤。原本餐牌係鵝肝沙律，服務員預早通知今晚改咗小食拼盤，我哋ok。端上嚟分量相當大，有炸魚柳、雞翼同薯條，新鮮炸起，好香口。雖然我會想食沙律多啲，驚熱氣，不過見到個分量，真係感受到店方誠意，都要讚下！主菜點咗龍蝦汁海鮮扁意粉同埋澳洲肉眼牛扒。意粉嘅龍蝦汁不及龍蝦湯濃味，海鮮配料冇乜味，遜色咗啲。肉眼扒叫五成熟，火候控制得好好，真係五成，食得出本身嘅肉味同肉質，冇經過梳打粉或鬆肉處理，分量都大，點埋附上嘅燒烤醬，味道唔錯，滿意！甜品方面有驚喜！兩客Tiramisu，原以為只係一小方塊嗰隻，點知係完整一客，雖然味道方面唔算突出，但真係誠意十足。今時今日，食材漲價，以咁實惠嘅價錢交出咁嘅質素，真係有啲感動。整體來講，呢間餐廳係用心經營嘅，雖然細節有美中不足之處，但絕對抵食，值得支持！