隱町 (花園街) (Moved) New Location

今日帶咗媽咪去食一間巷仔串燒，個名好有日本feel，日本串燒不嬲都唔錯，仲要通常要隱蔽啲就會好味，果然唔差。叫左六樣野食，分別係牛柳粒 ，雞心，雞脾肉，廚師沙律，豬肉提子，芝麻雞翼。牛柳粒，係澳洲嚟嘅和牛，食落去牛味非常重，都好多肉汁。雞心，呢度特別在就係原粒雞心燒，原來平時食開嗰啲都分開咗一半，串燒調味非常到位，雞心好彈牙。鹽燒雞脾肉，我覺得呢個最出色。聽講用既係阿江美雞肉，從張相都會睇到外皮有啲脆，水份非常充足，啲肉唔會一絲絲，係高質既表現。廚師沙律，配料用咗白毛豬，一定要連菜食，如果就咁食白毛豬的話會好鹹，沙律用嘅醋，都好夾。豬肉提子，呢個食嗰陣時要小心，因為提子係好熱嘅，如果呢個時候咬落去嘅話，啲熱汁就會飛晒出嚟。另外我係第一次咁食，發現原來提子呢個甜味中和得串燒豬肉嘅鹹味幾好。芝麻雞翼，正正常常，新鮮滾熱辣。總結：我覺得呢間野好適合去酒吧街嘅人，飲酒前或者飲酒後，去食美食，何樂而不為。