咖哩葉

Open Now

Now Closed

想講呢間「咖喱葉」，我真係一連食咗三日，試咗兩個素餐一個肉餐。結論係：素菜極度推薦，肉類水準就有啲飄忽。今次先講第一日嘅驚喜。話說嗰日好想食印度咖喱，喺附近search到呢間評價幾高，就決定一試。結果呢一試，就令我第二、三日都忍唔住要返轉頭。我第一日試嘅係佢個黑扁豆咖喱（素），我敢講，呢個咖喱好食過重慶大廈好多！重慶大廈好出名，但無論係地下定樓上啲所謂「明星推薦」，我都覺得麻麻哋。呢個黑扁豆咖喱出色在於，味道好濃郁，但又唔會死鹹，就算唔點薄餅，齋食都好過癮（如果你鍾意重口味嘅話）。口感好順滑，雖然睇落好濃稠，但食落完全唔會滯。啲味道融合得好好，辣味係後尾先慢慢滲出嚟，好溫和，平時食開十小辣嘅我都覺得唔辣，絕對啱香港人口味。個Naan薄餅都係功臣，新鮮熱辣出爐，外層脆卜卜，入面又帶少少濕潤軟糯，仲有啲煙韌，口感真係完美。不過要趁熱食，凍咗就冇咁好食喇。而且唔會油淋淋，感覺好健康。最痴線係個平日午市套餐，下晝三點前，素咖喱連汽水先$48，肉類都只係$58-68，真係抵到爛！加埋個環境行高級路線，雖然有啲金燦燦未必個個香港人鍾意，但坐得好舒服，絕對係物超所值嘅一餐。