琥酌 (Closed)

近來來自日本嘅燒吉列牛大受歡迎，香港亦有幾間特別岀名嘅吉列牛，有朋友就話呢間係食過最好食嘅，所以今日專程去太子試下。一星期前book左位，入座就好方便啦。首先當然要叫個吉列牛啦，我地選擇嘅係安格斯牛。琥酌岀名嘅係和牛，所以我地都叫左和牛嘅菜式，分別有吉列和牛薯餅，同和牛涮涮鍋。最後叫左一個冷嘅蕎麥麵。先上嘅係前菜，有蘿蔔同牛肉，全部都入味，牛肉更係十分嫩滑。吉列安格斯牛，份量剛好夠兩人食，本身炸到大約一成熟，自己可以根據個人喜好燒返幾成熟。牛肉入口香濃重牛肉，絕對唔係普通貨色，表面炸過嘅外皮更添口感。醬料有三種，我地就最愛有蒜蓉嘅醬汁，配燒肉一流！吉列和牛薯餅，裏面有一粒粒和牛粒，同薯仔嘅比例剛好，新鮮炸起，香脆可口！和牛涮涮鍋，食材新鮮且多，蛋，蔬菜，菇類同主角和牛，呢幾塊和牛絕對有驚喜，清淡嘅湯底令我地食到和牛嘅鮮味，而且真正入口即融，正！冷蕎麥麵作結，蕎麥麵煮得剛好，彈牙有口感，溫度亦適宜，浸落醬汁食清新無比，一洗油膩。