潮樂園 (和富道)

Open Now

Now Closed

唔知點解公司嘅同事好鍾意去潮樂園，猴子今次又係反對無效，因為今日係生日嗰位同事話事。今次唔係叫套餐各自食，而係嗌餸一齊食，都好嘅，可以試多啲唔同嘅菜。先嚟嘅係滷水鵝、墨魚同埋生腸三拼。滷水鵝真係唔使多介紹，差唔多係必食嘅，雖然猴子都係鍾情於較瘦嘅鵝片多啲。再嚟係凍烏頭魚，極度少油，啱晒猴子，肉質結實有咬口，有鮮味而無腥味。韭菜豬紅亦係唔錯嘅選擇，豬紅唔會一夾就散，韭菜亦夠爽。蠔仔肉碎粥，今次叫咗大碗嘅，味道鮮甜，如果材料可以多啲就更好。荔芋香酥鴨，猴子覺得呢個麻麻，芋頭同鴨都好濃味，而且容易滯。潮陽蝦蟹棗，夠香夠彈牙，不過份量真係少咗啲，中間嘅蕃茄無人問津。欖菜肉碎炒飯，炒得好香，不過之前已經食咗兩碗蠔仔粥，夠晒飯氣，所以只係食咗少少。猴子留意到潮樂園喺門口貼咗兩張分別係米芝蓮2018同2019嘅標籤，再加上北角呢間舖嘅位置唔算係旺區，所以都幾有「隱世名店」嘅感覺。