圓山台灣料理 (Closed)

平日行上諾士佛臺都見到有間台灣野一直都想試，今日終於有機會又得閒黎試下喇！未上去前我一直都以為係類似茶木咁既台灣料理，點知原來係類似舊式酒樓既格局！有兩個大電視，飲住台灣啤睇波一流！今次我地叫左個4餸set,328一啲都唔貴超抵！先黎前菜係蒜味青瓜，爽口！碟碟都好大碟！逐碟講下啦，台南肉醬豆腐，我初初以為佢係磚豆腐再淋肉醬係面，點知原來係類似麻婆豆腐既整法，仲要真係辣架添！酸酸地辣辣地，豆腐滑得黎又唔散，好開胃！再黎個台灣A菜，清清地蒜炒唔油膩，食落爽口好似油麥菜咁但又冇苦澀味蚵仔煎煎得好似蠔餅咁，蚵仔應有另外炸過，所以好香口，兩個人食哂成個都唔覺得滯！炒海瓜子，有好多好多粒！一啲沙都冇，粒粒肉都勁大粒！好惹味！！另外加左個肉燥飯，好香既滷汁，加上一啲都唔肥既肉燥，係我最愛瘦肉！如果鐘意肥肉既朋友可以叫滷肉飯～好食到唔記得影相最後我地唔夠喉仲加左個椰香棗茸糕，即叫即蒸，好好好好味！！紅棗味超香又唔會有渣，正到爆！值得一提係服務態度好好，見到我地成碟蜆殼會主動幫我地換，上菜速度都好快，屹立不倒咁多年總有原因！完美既一餐！