地點：上環
菜式：上海菜
餐牌：皇牌推介、健康菜飯類、湯麵類、拌麵類、蟹粉類、小食類、涼拌類、餅類、飲品，都有人氣熱賣皇牌套餐。
生煎包
先介紹生煎包！生煎包熱辣辣上枱！一咬入去就爆汁，而個湯唔會太油。個底好脆，面頭灑上蔥花同黑芝麻粒。另上碟仔俾你加醋食，更好味。
蟹黃生煎包 $18 一隻
一咬落去就覺蟹味好濃，真係有蟹糕喺入面，面頭加上黑白芝麻粒。
人氣熱賣皇牌套餐可以選擇唔同配搭加唔同數量生煎包。
鮮雞湯小雲吞12粒 + 生煎包2隻 $54
小雲吞塊皮又薄又滑，個雞湯好清，味道唔錯，唔似有落味精，伴有一條菜心同蛋絲。
迷你雞絲酸辣湯 + 生煎包6隻 $59
迷你雞絲酸辣湯果然迷你，用紙兜上，不過都好多料。除咗雞絲，仲有冬菇，黑木耳，豆腐粒，味道酸酸辣辣，唔錯。
麻醬手撕雞絲冷麵 $42
麻醬手撕雞絲冷麵好大碗。冷麵係黃色幼身麪，加有幼條青瓜絲同粗雞絲，灑上白芝麻粒。麻醬夠多，不過唔會過多。
袐製上海炸排骨 $22
袐製上海炸排骨一開6件，炸得外脆內嫩。
皇牌套餐奉送豆漿一杯。豆漿用茶杯裝，係凍嘅，都幾好飲。
總括而言，生煎包果然多汁又脆底，不失為一個快捷又唔會太飽既午餐選擇。
店舖好新，裝修光猛，座位正常，星期五午市滿座。
