樓下冰室 (Closed)

今日收工同住係荃灣嘅同事一齊食飯，發現呢間有style既冰室。一入到去見到樓下冰室招牌，再望一望餐廳嘅裝潢，真係幾乎合主題。四圍都有好多舊式海報同擺設，而且餐廳樓底夠高，所以上半部分都裝修左啲欄杆同假窗，一坐低就真係有置身樓下冰室既感覺。同事叫左一份招牌嘅番茄濃湯通粉配肥牛，一黎到就已經聞到好香嘅番茄湯味，我都忍唔住試左一啖，番茄味非常濃郁，而且仲有好多番茄蓉係湯入面，好有口感！番茄甜得黎亦都有少少酸味，好開胃，於是我再試埋通粉同蛋，蛋煮得好嫩，唔會好老，而且好有蛋味，完全冇偷工減料！通粉煮嘅時間啱啱好，唔會過稔，保持返通粉彈牙口感，加埋個湯配合得天衣無縫，真係冇得輸！我自己就叫左個瑞士雞脾配蒜蓉牛油脆豬仔包同粟米雜果沙律。首先，隻雞脾份量十足，好有肉地。雖然隻雞脾咁大隻，但係依然好入味，瑞士汁滲透曬成隻雞脾，每一啖都食到瑞士汁嘅香濃同甜味！而且一咬開隻雞脾，入面仲好有肉汁，食到瑞士汁之餘又食到雞肉嘅肉味，肉質都好幼嫩，唔會煮到老曬！沙律同蒜蓉豬仔包都好足料，沙律入面有好多新鮮生果仲有椰果，誠意十足；至於豬仔包嘅蒜蓉都好厚，食落有好香嘅蒜味，豬仔包外皮脆得黎唔硬，包身仲好鬆軟，非常滋味