心之食堂 (Under Renovation)

其實之前嚟過已經覺得呢間餐廳好好食，再次光臨冇令我失望。一入嚟餐廳已經覺得裝修好靚好舒服，枱同枱之間唔會話太過逼。唔係呀哩一杯飲品叫做青蛙王子，未食嘢之前佢就已經上左，味道有啲似Cream Soda 上面加咗一啲綠茶味嘅雪糕，真係好好食，夠晒Refresh!!! 餐牌上面每一道菜都好有心思，呢一個厚煎蛋叫做心之蛋捲（$88）。老闆話都幾出名㗎，啲蛋唔會煎得太老，仲保持到煎蛋嗰種香味同小小甜味，加埋上面嘅茄汁同埋沙律汁好夾！之後嚟到呢一餐飯嘅重頭戲，原條鰻魚石鍋飯（$118），首先講果條鰻魚先，佢真係唔慳成條上㗎。鰻魚燒到好香口，加埋照燒醬汁食落去外脆內軟。之後啲飯放落個鍋度燒得好好食！我哋仲叫咗一條燒鯖魚食（$58），呢個價錢真係冇得頂，喺香港食飯依家好少見到呢個價錢。但係餐廳唔將價就貨。條魚一食落去就知道係新鮮嘅，唔係雪藏貨。抵食呀！另外食日本野又點少得呢一個三文魚刺身同埋甜蝦刺身呢！呢啲刺身全部都好新鮮，尤其是個三文魚，食到人舔舔脷啊總括而言食物質素仍然保持到，坐落又幾舒服。難怪餐廳係銅鑼灣呢個競爭咁大嘅地區都可以生存到。如無意外定期都會返返去再試！