Video
Read full review
2012-04-22
1542 views
我鍾意印度素食, 而尖沙咀o既Branto可以話係本地印式素食館o既龍頭. 我幫襯佢地已差唔多有8年, 佢地一直以多款地道o既印式街頭小食, 同正宗o既北印度家常菜式, 使佢地口碑載道. 不論係鄉里、本地香港食客、以至係外國遊客, 都知道Branto呢個響噹噹o既名子, 慕名光顧. 近年多o左尖東o既「活蘭」同紅磡o既「Sharmaji」呢o的有實力o既兢爭對手o黎分一杯羹, 依然無損Branto係本地作為印式素食o既一哥地位, 晚晚o既黃金時段都客似雲來, 迫滿可以坐到成50人o既一樓場, 非常熱鬧.由於佢地o既小食同主菜o既多而精, 一次過介紹唔晒, 我決定將Branto o既食評一分為二, 呢一篇主打街頭小食, 而下一篇就介紹晚飯小菜. 至於今晚我揀左o的乜o野小食? 唔講咁多, 立即去片: 第一個上檯o既係 Sev Puri 「薯仔絲炸米餅粒」(見上圖): 呢個望落好似點心麵o既街頭小食, 坐底有9塊炸薄脆, 每塊薄脆都鋪上鮮番茄粒、洋蔥粒、薯仔粒、芫茜配以羅望子甜醬、香料, 最後以一層 ”Sev” - 即係以雞豆麵粉(gram flour)製成o既炸麵條碎 - 鋪o係面完成.
我鍾意印度素食, 而尖沙咀o既Branto可以話係本地印式素食館o既龍頭. 我幫襯佢地已差唔多有8年, 佢地一直以多款地道o既印式街頭小食, 同正宗o既北印度家常菜式, 使佢地口碑載道. 不論係鄉里、本地香港食客、以至係外國遊客, 都知道Branto呢個響噹噹o既名子, 慕名光顧. 近年多o左尖東o既「活蘭」同紅磡o既「Sharmaji」呢o的有實力o既兢爭對手o黎分一杯羹, 依然無損Branto係本地作為印式素食o既一哥地位, 晚晚o既黃金時段都客似雲來, 迫滿可以坐到成50人o既一樓場, 非常熱鬧.
由於佢地o既小食同主菜o既多而精, 一次過介紹唔晒, 我決定將Branto o既食評一分為二, 呢一篇主打街頭小食, 而下一篇就介紹晚飯小菜. 至於今晚我揀左o的乜o野小食? 唔講咁多, 立即去片:
第一個上檯o既係 Sev Puri 「薯仔絲炸米餅粒」(見上圖): 呢個望落好似點心麵o既街頭小食, 坐底有9塊炸薄脆, 每塊薄脆都鋪上鮮番茄粒、洋蔥粒、薯仔粒、芫茜配以羅望子甜醬、香料, 最後以一層 ”Sev” - 即係以雞豆麵粉(gram flour)製成o既炸麵條碎 - 鋪o係面完成.
薄脆底夠鬆脆, 新鮮什菜粒混埋羅望子甜醬同香料感覺清新, o的 Sev 炸得脆卜卜而唔油膩, 真係好似食緊點心麵咁過癮! 呢個小食集清新, 特別, 爽朗於一身, 令我停唔到口, 愈食愈開心. 唔使一陣, 隻碟空哂.
跟著o黎o既係 Medu Vada 「炸圈」(見上圖): Vada可以話係南印度o既鹹donut, 同「蒸米糕」Idli一樣, 都係風行南印度o既早餐同小食. Vada有多種做法, 而Medu Vada係由白米、黑扁豆、黑胡椒粒、洋蔥同香料磨合而成o既內餡壓成球狀, 再點上由雞豆麵粉製成o既炸槳鮮炸而成. 一上抬已經見到兩件大大件炸圈有煙冒出, 就知佢一定係新鮮熱辣即叫即整. 切開件炸圈o黎睇(見下圖):
裡面o既餡香味四溢. 雖然係炸, 食落口軟綿綿, 好濕潤, 味道好似食緊魚腐一樣, 又唔會乾憎憎, 兼且一o的都冇油淋淋o既感覺. 正! 能夠係呢度食到咁高水準o既炸圈, 實在難得, 好慶幸自己係香港人. 至於跟埋炸圈一齊上o既兩個點醬不可不提. 白色o既椰子醬 (coconut chutney; 見下圖):
係用磨碎o既椰子肉, 加黑胡椒粒同辣椒混合以成. 呢度o既椰子醬係地道南印度式製法, 椰子肉磨得較大粒, 辣椒同黑胡椒o既味道好 ”出”. 同Sharmaji o個o的幼滑又有深度o既椰子醬相比, 呢度o個o的比較粗糙同大路. 而另一個點醬 “Sambar 湯” (見下圖):
呢度已經做出傳統 Sambar 應有o既水準 - 蔬菜材料夠, 個湯唔會好稀, 酸辣味道適中. 同Sharmaji o個個又濃又多料o既 Sambar 相比, 呢度o既Sambar稍為遜色.雖然呢度兩隻點醬都被後起之秀 Sharmaji 比下去, 佢地依然係有水準, 食落好味之作.
食完炸圈之後, 第一道主菜出場, 就係「粗粒麵粉香料煎餅」(Rava Masala Dosa; 見上圖). 一般o既Dosa係用白米加黑扁豆磨成o既米漿製成, 而 Rava Dosa 係用粗粒麵粉 (Samolina, 即係平時用o黎做意粉通粉o既原材料) 加入小茴香所製o既麵糊, 同樣以米漿Dosa o既形式快煎而成, 接成三角o既形式上檯, 足夠兩個人分. 切開o黎食o個陣 (見下圖):
已覺得佢同米槳做o既 Paper Dosa好唔同 - Rava Dosa 保留著類似麵包咁o既柔韌性, 食落去, 軟身o既地方比米槳Dosa更煙韌更有口感, 每一啖都滲著小茴香獨有o既香味; 而中間同餅邊就煎得o岩o岩好, 脆身得o黎一o的都唔噥, 味道仲好似乳豬皮咁鬆脆. 爽呀! 至於夾o係塊餅入面o既咖哩薯仔餡 “Masala” (見下圖):
o係色澤, 口感同味道都係有水準, 架輕就熟之作; 講到味道夠“出”, Sharmaji o既咖哩薯仔餡則略勝一籌.整體黎講, 我相當鍾意 Rava Masala Dosa. 比起米槳o既 Paper Dosa, 佢更加充實, 更多驚喜.
全晚o既重頭戲終於出場, 就係「豆蓉配包」(Pav Bhaji; 見上圖). 呢個係以前英國殖民時代, 為o係孟買o既紡織工人提供平靚正午餐所創做o既經典街頭小食. 好o既Pav Bhaji, 包 (pav) 要夠扎實, 什菜蓉 (bhaji) 要夠香濃, 務求令食客滿足而歸. 眼前呢個「豆蓉配包」, 一大碟什菜蓉配兩個包, 加埋拌碟o既洋蔥粒同檸檬, 份量絕對充足. Branto 個什菜蓉 (見下圖):
係地道孟買街頭製法 - 薯仔、番茄、青椒、豆角、紅蘿蔔、青豆等豐富材料, 加入特製香料同牛油, 一齊放落特大o既平底窩壓成蓉同快炒. 食落每一啖, 好充實, 味道好濃郁, 感覺就好似食緊素食版o既免治牛肉一樣咁滿足! 加入洋蔥粒同埋洒上檸檬汁就會令濃味o既什菜蓉變得清新, 同樣係好味o既食法.
至於個包 (見上圖), 上檯時熱辣辣又聚手, 上下開邊, 裡面塗滿o係平底窩上加熱o既牛油, 係最正宗o既做法. 咬落口, 個包軟得o黎扎實, 絕對唔係茶餐廳o個o的輕飄飄兼淋啤啤o既行貨餐包. 點住o的好味道o既什菜蓉一齊食, 真係恍如置身孟買海灘旁o既露天食檔, 享受 “掃街” o既美妙感覺, 真係無以上之. 總結: 四樣咁地道同咁高質素o既印式街頭小食, 足夠兩人份, 都只係埋單HK$174免加一. 我就食到捧住個肚, 好滿足咁離開. 最開心o既, 就係佢地仲有好多款美味o既街頭小食等待大家去發掘. 以後要 “掃街” 唔使走到印度咁遠, o黎呢度就得啦!
下一篇, 我會介紹呢度o既晚飯菜式, 請勿錯過.
Post
