澳洲牛奶公司

Open Now

Now Closed

又係星期三健身後進食，唔知點解好掛住澳牛個炒蛋，見今日做完時間尚早，即使急急腳去佐敦先。澳牛最特別既風格一定係串咀既侍應，叫你坐邊疊枱無得SAY NO，坐低九秒九好決定好自己食咩。入得黎澳牛既香港人好似都知道呢啲潛規則，個衰佬唔知頭唔知路差啲比人開拖。其實都唔怪得衰佬，幫我哋落單個侍應企近我嗰邊，我好清楚睇到佢喺度手機買緊馬仔，衰佬唔知做咩八卦望實人哋個手機，侍應見衰佬係咁望實佢手機勁惡落完單行開。侍應行開我就細細聲問衰佬：做咩無啦啦啤實人哋個手機呀？！都唔關你事啦人哋買咩馬仔。衰佬Ｏ晒咀覆：我都唔知佢買緊馬仔，我以為澳牛宜家咁先進電子落單咪望兩眼！真係得啖笑～我哋叫咗兩份茶餐－牛油方飽，火腿炒蛋，叉燒湯意粉，凍檸茶我最欣賞佢個炒蛋，香濃既雞蛋味再加上佢個滑嘟嘟既口感，不過個炒蛋好似細份咗。而呢度既牛油方飽有烘底係好味啲既～叉燒湯意粉既意粉煮得好似淋得濟，下次我都係叫返通粉。