The Oyster House (Moved) New Location

朋友話想食生蠔好耐 ，所以專登揾咗依間生蠔專門店試下。首先梗係要試下生蠔啦。今次叫咗南非 Rollex、西班牙 Spanish L及法國 Geay。三款生蠔都非常鮮甜，肉質肥美，其Spanish L更成隻手掌咁大，要分兩啖先食得哂。三款海水味都唔算太濃，Rollex比較淡、Geay就最濃，自己就比較鐘意Rollex，但其實三款都好食！前菜係魚子醬蟹肉牛油果，牛油果creamy，蟹肉加咗洋蔥，食起黎帶點爽口，整體口感幼滑，加上魚子醬嘅鹹香，令味道更出眾，真係超鐘意依道前菜。主菜就叫咗蜆肉扁意粉及煎豬排。意粉彈牙，以蒜片橄欖油炒，令意粉唔會太乾，蒜味唔算好濃，但落咗啲辣椒，辣辣地好開胃。起初驚塊豬排會好乾，因為有好多次出街食豬排都頗失望，但好彩今次豬排夠juicy，醃得入味，就算唔點燒汁食都好夠味，亦唔會食到豬羶味，伴碟嘅薯仔更係出乎預料好食，好腍好creamy，又索哂啲肉汁，正！最後黎個自家製香蕉拖肥批，批底鋪滿拖肥醬，加上大大舊忌廉，好邪惡但一於少理。