香港腸粉皇 (Closed)

呢日約咗人喺土瓜灣譚公道， 見肚餓就走咗入呢間香港腸粉皇，諗住簡簡單單食一餐。叫咗個薑汁豬潤腸 ($20)、發財蠔豉豬骨粥 ($19) 、臘味蘿蔔蒸糕 ($15)及營養豆漿 ($7)。薑汁豬膶腸，豬潤嫩滑，腸粉腍滑，中間仲加左少少薑絲，味道唔錯。發菜蠔豉豬骨粥，蠔豉及髮菜都係碎上，食得出蠔豉係一般般貨色，不過呢個價錢，亦算抵食。臘味蘿蔔蒸糕，有蝦米、臘腸粒，及一絲絲嘅蘿蔔條。味道清清地，唔錯。營養豆漿，枝裝貨式，都幾有豆味，算係好抵飲。總括嚟講，都係一間用心經營嘅小店，值得多多支持！