龍亭

朋友推介下試咗呢間位於佐敦，主打鐵板燒嘅餐廳。餐廳位置都幾近佐敦港鐵站，入口位於轉角位，一不為意就會miss咗。餐廳主打幾個鐵板燒套餐，由五道至十道菜都有提供，價錢由$588至$1388不等。我哋兩個人點咗$588及$788餐各一，分別主要係$788餐多一個前菜及麵豉湯，而炒飯則係黑松露炒飯。鐵板海鮮有帶子、鮑魚及魚，海鮮入口新鮮好味，非常之正。餐廳好有心思整咗個呈泡沫嘅蝶豆花醬，用嚟點海鮮食，更突顯海鮮嘅鮮味。肉類可以揀雞、豬及牛，我哋兩個都點咗牛。佢嘅和牛質素相當唔錯，就算要咗七成熟，入口依然嫩滑可口。值得一讚嘅黑松露炒飯，飯炒得粒粒分明，廚師仲好細心喺烹調過程中切細啲飯，令到入口更加細緻。炒飯材料好豐富，加埋黑松露及蝦，呢個炒飯我俾好高分。甜品有益力多雪糕或檸檬雪葩選擇，我哋每個味道點咗一個，兩款味道都唔會太甜，尤其係檸檬口味，入口非常清新，足以解除食完鐵板燒嘅油脂感，好細心嘅安排。餐廳仲做緊麒麟啤買二送一優惠，鍾意飲返兩杯嘅朋友就啱晒。