龍亭

今日係佐敦試咗一間新開無耐嘅鐵板燒，餐廳喺佳佳甜品隔離，而且仲係十字路口位置，所以都比較易搵到，另外牆身同大門都用咗金屬顏色帶點神秘感。餐牌有廚師發板五道菜，七道菜、九道菜等等，因為第一次食所以保守啲叫咗五道菜試吓。入門廚師發辦套餐 （五道菜 / $588） : 有沙律、鐵板海鮮兩款、鐵板肉類一款、炒飯同甜品。頭盤係煙三文魚配魚子醬。鐵板海鮮兩款可自由配搭，揀咗特大虎蝦同東星斑，虎蝦啖啖肉超級正，喺食嗰陣時點埋隔離個濃蝦汁食落更加滋味，東星斑外面煎到脆卜卜，肉質依然咁嫩滑，另外再加錢叫多一款海鮮。鐵板肉類揀咗牛肉叫咗五成熟，牛粒肉汁飽滿，牛味濃郁。最後食埋材料幾豐富嘅炒飯同甜品，今次體驗幾好，有機會要試下貴啲嘅餐。