心之食堂 (Under Renovation)

想食日本野但又唔想太貴，家陣好多樓上餐廳價錢真係平過街鋪好多，今次朋友帶我來耀華街搵食，我地7.30pm上到去竟然好好彩係最後一張2人枱，星期一竟然全餐廳滿座，我唸好多街鋪都未必有呢個情景。餐廳餐牌亦係點菜牌，直接寫低要點乜，夠曬方便，食物價錢合理我相信係餐廳滿坐的其中一個原因。價錢合格食物都要好味先多人來既，先來點f串燒小食先，日本蕃薯份量少d但超甜，燒到剛剛外脆內軟，2分鐘已經比我快速ko了燒粟米雖然無乜特別，但勝在原條粟米切件，足足有5舊都係廿幾蚊，好抵食。露筍牛肉鮮蝦卷，多重口感，牛肉夠鮮味，配埋蝦一齊食原來好夾架喎。叫左2款壽司卷，吞拿魚蓉腩卷好肥美，一啖一舊，配啤酒一齊食，好滿足。另一款係炸蝦卷，蝦係新鮮炸起，咬入口非常香脆，配埋牛油果及其他配菜一齊食，增加口感亦非常好味，必食推介呢。最後再叫埋招牌鰻魚飯同炒菜，鰻魚大過我隻手，燒得剛好，魚肉夠曬厚身，石頭飯佈滿鰻魚汁，食到低仲有飯焦添，精彩。炒菜純粹用來清腸胃，哈，每餐都要有呢，均衡飲食嘛。今餐好滿足，2個人食到抱住個肚走，埋單每人都係2百幾，銅鑼灣區真係算好抵囉。