樸一拉麵

Open Now

Now Closed

今日自己一支公嚟咗旺角搵食，就想搵啲餐廳就算自己毒毒地食都唔奇怪嘅。咁啱又見到呢間拉麵好似幾多人排隊，就諗住try try. 就算自己一個入去食都要等一陣。以拉麵店嚟講，餐廳嘅湯底種類都好多，仲有期間限定款添。我今次就點咗一個魚介湯底($86)嘅博多麵 (白麵)。然後叉燒就要慢煮梅肉叉燒 (4片)。上菜啦，望落都幾吸引眼球。唔知點解碗拉麵上嘅材料感覺放得好整齊，有種用心嘅感覺。覺得幾好嘅地方係有得揀麵嘅種類，因為本身唔係好鍾意食黃色嘅拉麵。白麵會幼身啲，麵嘅軟硬度我揀咗軟。雖然白麵係俾黃麵幼，但係都無阻佢掛湯嘅程度，依然係好入味。魚介湯底帶點鮮味，唔會太鹹同埋太油。拉麵上面落咗啲木魚絲，感覺唔係好手軟。木耳絲大大嚿嘅竹筍都好欣賞佢個拉麵嘅叉燒嘅份量，有四片都好足夠。而且呢個慢煮梅肉叉燒一啲都唔乾身，軟身、帶有少少肥肉，個人覺得好滿意。另外加咗$13要隻糖心蛋，同樣係冇得挑剔。食住拉麵，望住埲牆都會望到一啲打氣嘅字句，感覺幾舒服。感覺幾滿意，下次希望食吓蟹膏湯底或者係海老湯底嘅拉麵。