圓山台灣料理 (Closed)

是日到美麗華返工，下午同同事去左圓山飲茶。第一次黎圓山，感覺同平時飲茶環境差不多，裝修唔見得好精𡟹，樓底都唔高，好普通。不過食過都同事都讚呢度食物不錯，而且唔太貴。我地一行三人，上左二樓的獨立房，竟然撞到叻哥陳百祥！！！我地點左招牌奶黃流沙包，腸粉，鳳爪，雞扎、春卷和炒飯。食物好快上枱，個流沙奶黃包熱辣辣，一撕開，啲流沙爆出黎，係我最鍾意嘅蛋黃漿，見到都開心。鳳爪炆得好稔好入味，一咬啲骨就分離，雞扎就正常水準，我欣賞嚿芋頭好粉，好好食。春卷新鮮即炸，脆卜卜，但因為熱氣，所以我無食好多，但係佢係好食，因為隻蝦好爽口。最後就叫左個瑤柱蛋白炒飯。啲飯炒得好乾身，粒粒分明，入面有菜遠粒，蛋白，瑤柱，簡單得黎真係好好食，我一個人食左2大碗。腸粉好滑，而且料又足，蝦大大隻又彈牙，食落口滑嘟嘟，同事大讚!第一次黎食圓山，感覺很不錯，價錢唔貴之餘，食物又有水準，雖然格局係一般茶樓，但食物就絕對出色。食完飯仲有個足料糖水送，成餐飯好圓滿呀，呢間會encore。