傑克漢堡 (Des Voeux Road West)

Open Now

Now Closed

本身自己住高街呢幾年都會特登搭小巴落石塘嘴傑克漢堡買外賣返屋企食。之前一向都係兩個哥哥仔做收銀同煮，食開都好好味。反而今次(May18,2024 17:57)係本年第一次幫襯，去到見轉晒全女班，諗住女仔煮野有心機會加分，成包外賣用釘書釘封晒口，明明叫左四個餐再另加一個包，點知返到屋企一打開四個餐得三份薯條？？？？ 阿女個蛋豬堡成隻蛋爆開晒漏到四圍都係！以前塊牛兩邊煎封得好香口而家直頭無牛肉香味🤬，重有洋蔥煙肉烤牛堡塊煙肉白晒晒唔好話煎連拉油炸都無做過好似食白烚五花鹹肉咁😡收銀阿姐零笑容都唔緊要，漏左包薯條、個包 9 整已經係死罪！一次不忠，百次不用

見細細到一間鋪，諗住小本經營會比心機做食物嘅質素，點知一出嚟，個漢堡凍嘅，入面啲料好鬆散，完全唔似一個漢堡，個包硬嘅，唔知佢係咪冇煎過個包，醬又唔夠多，當然亦同佢塊漢堡一樣都係凍冰冰嘅，最後連汽水都係唔凍嘅(我已經起18度嘅天氣飲佢罐可樂)，超頹，仲要等咗15分鐘等個難食到嘔嘅包，又貴，又唔好食，千奇唔好去，一定令你覺得浪費時間、浪費錢！

網上外賣平台點餐，取餐時已見他呼喝其他網上外賣平台 外賣員，到我取餐鬧我只講取餐no, 不説是網上外賣平台, 不斷鬧我, 說自己是老闆娘隨便投訴，這態度隨時執笠，幫襯多次也未見過這個説自己是老闆娘的女人

今天中午我scan QR code用訪客身份下單，沒有出單號，之後我俾佢睇我付款記錄，佢話冇單號唔俾，也不肯退錢。態度非常差，俾錢買難受，不會再有下一次！！！！！！！

訂了一個蛋牛堡，再俾錢加多咗一個蛋，臨走嘅時候我都問吓佢係咪已經加咗單，佢話係，返到嚟嘅時候個包裏便一隻蛋都冇，有冇搞錯？個訂單已經叫做耐，超過15分鐘一個餐有冇搞錯？舖頭有一浸味，因為係後巷

是日放假，起身已經1點幾，起身睇下家附近有咩食。見到屈地街有間Jack burger， 然後open rice原來有得落order ，(我之前真係未用過落order功能)，就點左芝士牛肉漢堡， +10蚊嘅魚手指。拎左回家食，魚手指我係覺得幾好食，要拍手掌。芝士牛肉漢堡算不錯，我個人覺得俾mos burger的牛好食(對面街有意見，剛中伏不久)，但未去到最好好食， 總結來講係我會再幫襯。

平時有食開 的確係性價比較高除咗扭紋薯條有陣時炸到太脆 無晒中間薯溶口感外 其他全部都好好食 我爭熱狗係未食過嘅啫今日叫咗脆雞堡 舊雞炸到燶晒 咬落去得好硬個隻脆 完全無肉質感覺 大家睇相就知 啲肉乾到差啲咬唔開 已經唔係全熟好鞋個隻乾 係完全脫晒水好似風乾咗好耐個隻乾 同埋唔知係咪炸到燶晒 成舊得少少肉 其他全部都係炸粉口感 咬咗幾啖個口都損晒 如果唔係落大雨一定落去換希望控制好個火喉 唔好再炸過龍 之前食過雞堡係好食過m記嘅 但今次真係搞唔掂 炸到燶晒就真係唔好出貨 我諗我暫時都唔會再幫襯住

西區近來開咗好多漢堡包小店，沒有堂食，只有外賣，價錢跟M記差不多，姐姐仔又話新鮮即做，咁試咗先講招牌牛堡：個包真係熱辣辣，如果可以焗耐少少會香脆點；牛肉真係手做的，不是M記那種死實實的，但牛肉乾咗少少，有啲鞋口；生菜唔夠脆，但$23呢個價真係無得投訴喎最抵死係下午茶時段$23仲有汽水飲，好食又平過M記，仲想點？下次要試埋豬堡&雞堡

好少見到咁平嘅嘢同埋啱啱新開所以就諗住試下嗌咗個33蚊招牌牛堡餐 餐入面有嘢飲同埋薯條 但因為唔想咁熱氣所以免費轉咗牛油粟米漢堡整體有啲乾 個肉餅有啲多根個粟米都幾大杯 牛油味都幾重但已33蚊嚟講都幾抵食

初嘗小店最近期間限定推出嘅法式魚柳堡，套餐形式(連薯條同汽水) $43 + $19 炸魚手指。本身因為店面無咩裝潢，而且平民價跟M記差唔多，所以純以支持小店心態試試，期望不大，點知： 第一印象食物到手時仲係熱手，相信係即叫即整，所以等咗十零分鐘就有得取餐非常快手～ 先講賣相，我初頭以為個漢堡包會跟M記一樣圖片跟實物不符⋯點知唔單只材料仲係熱辣新鮮，而且非常足料，賣相跟佢fb page 張宣傳圖片一模一樣！！ 打爆卡後終於開始食，包有包味，魚有魚味，生菜新鮮脆口，醬料爆汁超好味，薯條、炸魚手指都粗身有咬口！換著有堂食、裝修grand啲嘅餐廳呢個餐實收你超過一嚿水⋯ 所以會繼續encore，其他再嚟開西環要再試齊小店所有真材實料、性價比極高嘅傑克漢堡 ～～ 註：希望店舖日後可以提供埋紙巾就perfect，因為自己係運動後外賣到海濱公園食，無兩手準備⋯最後食到滿口滿手爆多醬汁醬料收場，好彩公園有洗手間。