星期六同阿媽出咗尖沙咀行街，佢話夜晚唔想煮，所以就搵吓附近有冇嘢啱食。我哋行到去厚福街，見到小店「舊時光石磨腸粉」幾多人排隊，而且見餐牌啲嘢好似幾啱食😍。小店主打外賣🥡，但同時亦提供企位供堂食。喺等候食物期間，我就見到有兩個後生靚女係熟客仔，就算大熱天時都唔介意企喺度食。我哋預三個人開餐，所以總共買咗六樣嘢食，埋單都唔使$200，性價比極高👍。全部食物即叫即整，不過等候時間都好快。秘制牛腩撈石磨粉($48)，石磨粉超墜手，原來一盒份量有咁多！我估計石磨粉應該係同陳村粉差唔多，未煮前可以攤開一大片。佢透薄順滑，索汁一流。🐮牛腩雖然唔大件，但亦唔等如碎濕濕，而且肥瘦適中，質感唔嚡，味道唔錯。石磨粉加埋牛腩，感覺有啲似牛河，哈哈。麻辣雞絲撈石磨粉($42)，🐔雞有兩種揀，分別係雞絲VS手撕雞，我哋要咗前者，估計雞柳係切開咗一條條後先拎去蒸；而手撕雞就相反，係將雞蒸熟咗先再手撕。不過講到尾麻辣汁先係重點，佢嘅麻辣超級無敵正🌶，辣度同鹹度都好出，食落勁惹味，石磨粉墊底盡吸精華。韮黃鮮蝦腸($25)，我認為普通腸粉比起石磨粉份量少啲，即使造型有啲似，都係皺皮，但勉強會見到形狀係一條條。蝦腸用料新鮮，蝦肉爽彈，但佢就無酒樓嗰啲蝦咁大隻🦐。雞蛋肉碎腸($23)，呢款腸粉係小店招牌，雞蛋同肉碎係最大路嘅食材，不過拼埋一齊就成為經典口味。腸粉滲透出微微蛋味🥚，而肉碎就好足料，每啖都食到。蒸米粉($30)，我哋另外仲嗌咗米粉🍚，見蒸嘅煮法比較少見就想試吓。蒸米粉自身比起乾炒有點失色，因為唔夠乾爽同味道較淡。不過撈埋面頭啲肉碎、雞蛋、菜甫同蔥一齊食，味道即刻有所提升😃。佢嘅菜甫好好味，唔會太酸太鹹，而且仲好有咬口。麻辣雞腎($28/小)，由於呢日係星期六，小店星期日唔開，所以腸粉以外嘅食物賣到七七八八，麻辣小食得返雞腎可以揀😳。雞腎偏細粒，但勝在有好多粒，加上質感爽彈，撈埋麻辣汁同芫荽食係滋味嘅。總括嚟講，舊時光石磨腸粉嘅出品令人一試愛上😋，我本身唔特別好腸粉，但估唔到而家有少少鍾意咗佢👉🏻👈🏻。呢度嘅石磨粉口感超細滑，比港式小食店食到嘅腸粉薄好多，就算放耐咗都一樣咁好食。另外，小店自家製作嘅麻辣醬汁好啱味蕾，簡直令我欲罷不能🙈。最後簡單總結：小店值得推介！…Read More
