Haidilao Hot Pot (Lee Theatre Plaza)

一向都好怕排隊， 所以大受歡迎嘅海底撈喺香港開分店都無緣一試。 今晚有朋自遠方來， 佢又好少返大陸，就帶佢去食啲有特色嘅火鍋。今日會喺銅鑼灣嗰邊放工， 晨咁早就去攞位。 去到都已經 有不少人 坐住等。 一慣嘅熱誠， 食住小食坐住等， 等都等得舒服過人😉仲有免費修甲服務， 時間關係我哋都冇試。 雖然係gimmick嘢 但設備齊全好似幾專業下。火鍋店佔了全層， 其中一面窗邊卡位，居高臨下，勁好view. 內籠好大，仲有vip房。店員先遞上飲料，前菜， 滋潤糖水，水果 等一路食一路等開爐。醬料區款式多又齊， 陣容鼎盛 （每位$18）先選湯底， 又貪心又怕辣， 店員提議點選四格火鍋， 比雙拼更平，其中兩格是清水。一格清油麻辣，一格蕃茄濃湯。 如果太辣就用清水果格用嚟過冷河😁清油果格勁多花椒，油香夠，但麻味唔太重。 蕃茄嗰邊任何人都適合， 勁重茄味， 往後加湯都一樣咁濃郁。撈派滑牛肉（半份）$49調味過嘅牛肉， 勁嫩滑， 但又不失肉嘅味道。 放蕃茄味嘅湯好夾！👍👍西班牙豚肉 （半份）$84薄切好有肉味， 不肥不瘦。撈派豆花（半）34有自己秘製嘅醬料。 有啲似蜂巢豆腐，但更綿更滑，配上秘製醬汁， 帶少少麻辣同麵醬味， 好過隱好有特色。撈面（ $18）覺得係全手工拉麵， 師父（ 年青人手藝純熟 ！）喺你面前即席表演拉開麵條， 淥三分鐘左右， 煙韌又索湯， 非常滋味!手切牛小排（半）$94火鍋唔少得的一款精選嘅牛肉油花緊密平均， 食落甘香，肉質嫩滑！巴沙魚片 （半）$44魚肉好厚好軟滑，已醃過， 有啲似九肚魚肉質, 但可放心食完全無骨。活蝦（半）$68 在這裏點选活蝦， 絕對能體驗海底撈 貼心嘅服務。 店員純熟地 把剛淥好的串蝦 用筷子一推，三兩吓手勢已去殼， 神乎奇技好想學呀！ 完全唔使落手剝，乾淨俐落， 蝦肉鮮甜彈牙!加咗個雪米糍（$3/個）， 中和一吓濃味的湯底。席間仲有變臉表演， 有得食又有得睇！食店抽氣做得唔錯， 回家的衣服冇嗰陣花椒麻油味。店員好有笑容， 服務殷勤， 時不時都斟添飲料又加湯。 久違了的賓至如歸感覺才是此店的引人之處。…Read More

無論係香港定內地，不缺乏火鍋店，選擇十分多，但有一間一直聲名甚廣，而且人氣多年來依舊，就係「海底撈」，以超班服務岀哂名，咁佢食物質素其實又點？餐廳內外去過內地食過海底撈既大家，應該都知海底撈唔止店內環境大，連比人等位既地方都好大，而且服務周到，最厲害係有免費美甲服務，真係可以話係第一間有呢啲服務提供既火鍋店，仲有變臉表演，好有諗頭。仲有袋比你袋住電話同埋抹屏幕濕紙巾。自助調味區及飲品 $18+15/位同一般火鍋店一樣，係自助揀醬料，呢到款式比平時見到既多好多，亦有中華沙律、茹、水果等等。至於飲品就由店員幫你，非自助形式，是日有柑桔蜜、檸檬茶同埋豆漿，前兩者都好淡冇乜味，似溝左水，反而豆漿幾濃味。四宮格鍋：胡椒豬肚雞、蕃茄、清油無渣麻辣、青椒火鍋   合共$147胡椒豬肚雞蕃茄清油無渣麻辣青椒我個人最中意係清油無渣麻辣同青椒！兩款都岩嗜辣者，而青椒比起清油無渣麻辣更加入味，蕃茄都好濃味，餐牌仲括住明星湯底添，果然不錯，至於胡椒豬肚雞就較平庸。活蝦（半份） $69上枱時仲係活生生，絕對新鮮，有6隻，烚一烚就食得，店員亦會走過黎幫你剝蝦，三兩下手藝就剝好，不過呢隻品種唔大隻，唔算太彈牙。撈派滑牛肉（半份） $49之前係內地食海底撈食過一試難忘，肉質厚而不實，稔口又吸到湯底，必點！西班牙梅豚肉（半份）$84份量不少，每塊色澤一樣，雖然薄切，但都不失其口感，冇豬腥味，不錯。芝士牛肉丸（半份）$44得4粒，偏貴，而且size細粒，食落冇乜芝士，唔需要點呢款試。剝皮魚 （半份）$64同為4條，size都係偏小，約煮4分鐘就食得，肉質同骨容易分離，但唔太索汁，之前係內地食海底撈食過巴沙魚，係冇骨屬魚塊，剝皮魚同巴沙魚我會中意後者多啲。響鈴卷（半份） $14半份有4個，今次就落青椒湯，啖啖都辣得過癮！撈面（一條）$18雖然$18得1條，價錢就真係偏貴，但有得睇師傅拉麵表演，加上麵質都彈牙掛汁，值得一試。食完仲送飯後甜品次次食完火鍋/雞煲，個身都一大股味道，但食完海底撈，真係可以話完全冇味，佢個鍋爐設計得好好，會吸返啲味，所以都唔會成間店充斥火鍋味，亦唔會覺得好口乾，係一間我會掛住既火鍋店！…Read More

「海底撈」，相信好多人都識，以前要北上先食到，但自從佢宣布會係香港開分店，有好多fans都好高興，方便好多。我係內地其實都食過一次，但係香港開左好一段時間都未黎幫襯過，一於試下水準一唔一樣！環境位於利舞臺19樓，佔左成層，地方寬敞夠大，當然少不了等位專區，相信大家都知海底撈服務一流，輪候期間會有小食、生果供應，最令女士喜歡一定係免費修甲美甲，仲有好多顏色添！居高臨下，望到銅鑼灣鬧市。餐牌由於用平板電腦點餐，選擇眾多，冇一一拍照，但之前睇過blogger攻略，知道點四宮格湯底係最划算，如果食唔足四款味道，可以點兩格係清水($0)，比雙拼平好多！不過今日就豪啲，試哂四格唔同味！自選調料 $18/位選擇眾多，連牛肉末、菌王醬都有，配合不同口味需要，總有一款岩你口味，仲有涼菜、生果、糖水任食。自選飲品 $15/位分別提供凍檸檬茶、凍柑桔蜜及熱豆漿任飲，基本上你一飲完就有店員幫你refill，我就飲左好多杯熱豆漿，因為係無糖，同埋豆味好濃郁，完全唔會溝水，飲多會飽肚！清油無渣麻辣火鍋+ 青椒火鍋 +蕃茄火鍋 + 胡椒豬肚雞火鍋 $147每款鍋底價錢不一，分做四格/鴛鴦價錢又唔一樣，我今次咁樣拼就$147，有部分鍋底仲可以有要求，麻辣揀左多麻標準辣，因為冇渣，少左好多辣椒，食起上黎冇咁辣同拔野食既時候方便啲。青椒火鍋同為辣湯底，估唔到食落比起麻辣更辣更麻！又帶微酸，食落好爽，比起麻辣，呢個我更喜歡。蕃茄火鍋揀左加濃多蕃茄，呢個湯底又係不得了，愈煮愈濃郁，真材實料，食落去茄味十分足，煮到最尾湯底好濃稠，煮咩落去都索汁，蕃茄湯底一定要叫！至於胡椒豬肚雞都有好多湯渣，但就比較清淡，胡椒味太淡，入唔到味。招牌蝦滑 $54/半份本身想點雞蛋、麵筋、蝦滑個set，學內地網紅食法，不過香港暫時未有呢款叫法住，咁就食普通蝦滑先。會有店員幫你整，唔洗自己黎，拔好一粒粒波波Size再問你想放邊個湯底，都算彈牙，質素正常。撈派滑牛肉 $49/半份海底撈必定要食滑牛肉，厚身，食落肉質鬆化，沾少少䜴油已經好正。撈派豆花 $34/半份件件都大大件，係蜂巢豆腐，小孔會吸湯底，打邊爐必點，同樣會有店員幫你手落，唔驚自己唔識夾整散哂或者失失搞到湯底四濺，店員告知煮太約5-8分鐘，會幫你拔埋專點豆腐既醬汁，四個湯底都索到汁，同樣美味。招牌毛肚 $64/半份半份都夠，毛肚可掛汁，食落索脆，但偏薄身。手切牛小排 $94/半份牛小排比較厚少少，色澤紅潤，食落有少少似肥牛，但又冇肥牛咁多脂肪，牛味頗岀。長生菜 $14/半份今次唔放落辣湯吸哂啲油，放落蕃茄湯同胡椒豬肚雞湯，健康啲，同埋放蕃茄湯索汁真係冇得頂。撈面 $18/條又係必點，因為係海底撈招牌，有店員係你面前即場拉麵條，仲會係你面前fing。一條其實真係唔多，不過係食完野之後食其實兩個人share，過下口癮都夠，落哂去蕃茄湯底，十分掛汁！食食下突然播出中國風音樂，就知道變臉出場！小朋友睇得特別開心！總括而言，食過海底撈既朋友都不難理解點解佢咁紅，就算排好耐隊都要食，因為無論食物、味道、服務都係中上水平，香港好多火鍋店都係呢個價位，甚至更貴，但服務呢？真係好少做到海底撈咁貼心，抵佢岀名！…Read More