去西灣河太安樓搵食，都係掃吓街頭小食或者買外賣店，點會諗到會去食日本菜，仲要係海鮮丼？呢間新開嘅海鮮丼店鱻屋（讀音：鮮），製作絕對認真，雖然唔係魚蛋燒賣等小食唔同價位，但價錢相比起旺區海鮮丼店平得多，最重要有新鮮嘅拖羅食！

店子細細間，燈泡招牌幾有日本小店氣氛。店主Rayman為30多年經驗日本菜廚師，早幾年開始接觸吞拿魚買賣，更成為進口商，批發俾香港餐廳。Rayman住喺附近，發現呢區少餐廳賣吞拿魚，於是試吓自己開舖，主打吞拿魚同海鮮丼。

Rayman揀嘅係養殖藍鰭吞拿魚，並非瀕臨絕種的野生魚，來自日本、澳洲及歐洲等產地，原條入貨並於工場劏魚。「唔少人話竟然夠膽喺太安樓賣刺身，初頭都有街坊覺得貴，亦有人之前從未食過吞拿魚，試完又鍾意食。食開日本菜的話，就知我哋拖羅賣得好平，旺區餐廳可能賣緊過百蚊一片，我哋嘅丼賣$198有四片，係好抵食。」

最多人食嘅本鮪大拖羅丼$198，四片厚切拖羅為吞拿魚下巴嘅Kamatoro或魚腩位Otoro，鮮嫩粉紅色魚肉，脂粉平均分佈如雲石，食落有濃郁魚油香，滿口鮮味！食時記得加少少豉油同生磨芥辣，wasabi係日本新鮮貨，唔會好搶味，但就可以提鮮解膩。

想試勻魚味就要食本鮪壽司盛 $108，有齊大拖羅、中拖羅、赤身同葱吞拿魚蓉，由脂肪量少嘅赤身開始食，就可以試出唔同部位嘅味道！壽司飯選用新潟米，鬆緊度剛好，醋味亦適中。

除咗吞拿魚，海鮮丼仲有唔少選擇，價錢$58起。最豐富嘅鱻屋特選刺身丼$178，有自製玉子燒、赤蝦、左口魚邊、三文魚、鯛魚、松葉蟹肉、三文魚子、加拿大海膽、赤貝、油甘魚、吞拿魚赤身同磯燒鮑魚，份量十足。

想重口味啲，呢款火炙平目緣側丼一定要試！丼飯上面舖滿左口魚邊，即叫即燒，魚油立即標晒出嚟，魚肉滑到入口即溶，而且有微微鹹鮮，非常甘香！只係賣$78咋，壽司店只係食到兩件。

其他細微位都有心機，除咗用生磨wasabi，連附送嘅味噌湯都加咗魚肉煲成，特別鮮甜。

鱻屋

地址：西灣河筲箕灣道57-87號太安樓第三街A61A號舖

文、相、片：Perrins