由音樂界跳入埋飲食界嘅拉麵哥，上次帶大家去咗食兩間佢私藏嘅豚骨湯拉麵，今次佢又揀咗兩間心水嘅沾麵店同大家開心些牙。
彩
呢間舖嘅本店，位於元朗一個球場側邊嘅小巷，都幾偏下，唔係元朗人都應該要花啲時間先搵到，雖然係咁，但人氣依然長期高企，好多時要排隊先有得食，而上個月，就喺港島都開咗間分店。喺度獨沽一味，只賣沾麵，不過就有好多款唔同味道嘅沾麵，例如香橙味、檸檬麵、紅椒麵，同拉麵哥今次試嘅羅勒麵等等，每日供應其中三款，食到邊款真係睇你彩數喇。
拉麵哥點評：
今次試嘅有黑蒜油湯底同原味豚骨醬油湯底，麵方面就有原味小麥麵同羅勒麵。
羅勒麵條食落真係有好勁嘅香草味，所以唔使選配太濃味嘅湯底，配原味就OK。而呢個原味嘅湯底，除咗飲得到豚骨醬油味之外，仲試到有好強嘅柚子味，應該係呢間舖嘅一個touch。
BTW，呢度嘅紫菜，應該係全港最精美嘅拉麵紫菜，但同時都應該係最細塊嘅……
元朗店：元朗建德街26號益利大廈地下14號舖
西環店：西環石塘咀屈地街16號金陵大廈地舖
富士山55 (拉麵沾麵專門店)
呢間店係名古屋過江龍嚟，拉麵、沾麵都有得食。每張枱仲設有小型電磁爐，食沾麵嗰陣，個湯底凍咗可以隨時自助整返熱嚟食。另外，嚟呢度，食到幾飽都好，都一定要留返少少位畀芝士撈飯！追加嘅，芝士味超香濃呀。
拉麵哥點評：
海膽：今次試嘅係特濃海膽沾麵，唔止沾麵上有海膽，就連湯底上亦都有！海膽呢家嘢，不時不食，每個唔同季節都有唔同嘅產地係最靚嘅，而拍攝嗰陣係9月，就用緊加州嘅海膽。
麵：食呢款沾麵，識食一定係將麵條沾上湯底再連同海膽一齊食！正！
湯底：濃厚程度喺香港嚟講，數一數二。佢混合咗豬骨、雞骨、魚介加海膽，真係非常濃厚。對自己嚟講，沾麵湯底一定係愈濃愈好食！
芝士撈飯：呢個真係飽一飽都要食，一整熱完就食，係做到拉絲效果㗎！好芝士㗎！
尖沙咀店：尖沙咀麼地道75號南洋中心地下7-8號
銅鑼灣店：銅鑼灣伊榮街9號欣榮商業大廈地下1號舖
重溫： 「拉麵哥帶你食拉麵 豚骨湯篇」
文：Kar
相：Calvin