近呢幾年，香港愈嚟愈多人鍾意飲手工啤酒。根據美國釀酒師協會嘅定義，手工啤，即係產量少（年產量少過600萬桶）、獨立製造（釀酒廠股份入面，唔可以有超過25%係大酒廠）、以傳統手法釀製（用新鮮同特定品種嘅啤酒花釀造，唔會加粟米）嘅啤酒。
除咗喺各類大小嘅啤酒節可以飲到之外，都有唔少餐廳陸陸續續引入，今次就同大家推介其中7間，不論係手工啤酒定食物水準都唔錯㗎，以後放工去chill，就唔使煩啦。
第三者x甘梅薯條 WOFT
圖：呢間喺旺角嘅小店，德國、澳洲、美國、日本、台灣等等嘅手工啤都有得飲，當然本地嘅都有啦。踏入夏天，可以試下台灣24節氣手工啤嘅「小滿」，係用冬瓜茶嚟製作㗎，夠晒清爽解暑。又或者本地品牌城釀嘅「港男」、「港女」、「第三者」都值得一試，其中後者係話梅啤嚟，飲落酸酸咪咪咁幾清新。
至於佐酒小食，就最推介呢度嘅甘梅薯條，講清楚啲係蕃薯條，炸到脆脆der，面層再灑上梅子粉同盬，酸中帶蕃薯甜。
Heros x 腐乳雞翼 TAP The Ale Project
圖：羅家大小姐
貪心仔嚟到可以嗌platter，一次過試到3款。最近新上巿嘅本地品牌Heros呢度都有得試呀，女生可以試下果香同草香味較濃嘅CEREUSLY，至於AP-09就係集堅果、焦糖、拖肥味於一身，層次比較複雜。另外，鍾意伯爵茶嘅朋友，呢度有款嚟自紐西蘭嘅手工啤叫嘅 Gunnamatta IPA，滲有伯爵茶香味㗎。
雞翼配啤酒都係唔錯嘅選擇，呢度仲有款係點配腐乳醬嘅雞翼，係特別嘅，而且仲好鬼香口。
Professor X x 燒魚骨干 掌門精釀啤酒
圖：babyzbb
呢間係來自台灣嘅過江龍，定期都會換下酒款，即使成日去嘅朋友都唔會飲到悶。呢度嘅手工啤都係由台灣自家酒廠釀製，再新鮮直送到港，其中，Professor X就係開飯仔嘅長期最愛，麥芽味突出，甘香，有些少似黑啤嘅濃。另外佢哋有隻最新款叫IQ博士，係啤酒版嘅Mojito。用酸酸做基酒調出嚟嘅，爽爽der好啱夏天飲。
雞泡魚干送酒，特別送啲酸味重啲嘅酒當然正，不過建議可以試下用燒魚骨干代替，比起雞泡魚干更有咬感，更香口。
鹹檸啤x炸辣雞 何蘭正
圖：本地同外國嘅手工啤都可以喺度飲度，包括門神、麥子、Heros、獅子山、城釀等等本地品牌，想要特別少少嘅，可以試少爺麥啤嘅鹹檸啤，真係用鹹檸嚟釀㗎，酸得嚟又有少少鹹咁，又香港人係要試下獅子山下，麥味同果香味嘅平衡做得幾好。呀，嗌酒就會送碟枝豆。
嘢食方面，食得辣嘅話，毫無懸念，炸辣雞！畀定心理準備你，堅係辣呀，醬汁係甜辣嘅，但炸雞面本身已有辣粉，係幾刺激嘅。加上炸得脆，肉又嫩，配酒幾正。
澳洲Pale Ale x 藜麥粟米燒 Little creatures
圖：eddie_ilovefood777、wander2wonder
呢間就係澳洲嘅過江龍，100蚊可以試到6款100mL嘅手工啤，係幾抵。Pale Ale係招牌之一，啤酒花味好香，同時滲出麥芽苦同花果香，口感醇厚，配pizza或者burger食都幾夾，另外一隻India Pale Ale嘅酒花味就更加突出，略帶甘苦，重口少少嘅朋友就啱晒。
有款幾特別嘅小食叫Corn on the Cob，係喺燒粟米嘅外圍，鋪滿晒藜麥，夠晒健康。兩重口感，一層甜一層有咬嚼都幾得意。
常陸野x生蠔 Season Plus
圖：kimmamon
觀塘呢間餐廳，估佢唔到一落到去就成個酒庫咁，紅酒白酒手工啤咩都有，完全係一個畀酒包圍嘅世界，開心死酒鬼。呢度嘅手工啤就以其他國家嘅為主，例如荷蘭有隻Gulpener Neubourg Pilsner，泡身相對較濃，味道清香。另外，日本嘅貓頭鷹手工啤（常陸野）都有好多款選擇，最新嘅就有塩梅，而如果想要濃少少嘅，就有用咖啡豆精釀而成嘅Espresso Stout。
而大部分人嚟到都一定會嗌生蠔，99蚊有6隻生蠔加3隻炸蠔，海水味重，算係滑身，性價比幾高。
美國IPA x 雙重松露熱狗 Doodie Cafe Bar
圖：荃灣都有酒吧呀，小店嚟講，呢度嘅手工啤款都算幾多下，有本地有外地，鍾意酒花味甘少少嘅，美國嘅Go To IPA係一個選擇，另外有款荔枝啤酒都幾fresh下，甜甜地，啱女仔飲。
雙重松露熱狗可以話係呢度嘅招牌菜，一條熱狗又落黑松露又落松露醬，rich到一個點。仲夾埋牛油炒蛋同德國腸，未食已經畀陣香味吸引住。
文：Kar
