近年大家愈嚟愈注重健康，加上唔少KOL帶起素食主義，大家對素食認識更加多，對素食嘅印象有180度轉變，素食健康又環保，而且仲同普通食品一樣，可以做到色香味俱全，未試過就快啲跟住下面嘅推介去試下啦！
素食咖啡店 齋啡
想打卡又想試下素食？咁呢間咖啡店就最適合啦。齋啡裝修以白色同木為主，好IG-able～佢哋係一間由網店做起嘅手工訂製素食專門店，供應無蛋奶嘅純素食品，主打咖啡、輕食同甜品。特別推介純素榴槤蛋糕，食落陣陣榴槤香味，而且即使無落蛋，但都保持到蓬鬆！
►詳細介紹：尖沙咀新開純素Cafe 自家製榴槤蛋糕/牛油果多士/墨西哥卷
純素定食 V.W Vegan Cafe
呢間Cafe提供嘅所有食物都係素食，選擇多元化，有多款日式同西式純素菜式，啱晒初嘗素食嘅人。其中，日式媽媽定食仲十足日本家庭媽媽煮嘅飯咁，唔知仲以為去左日本！甜品同咖啡都有水準。
►詳細介紹：大埔新開西日純素Cafe 嘆媽媽定食+手作餃子+甜品
純素甜品 Moono
呢間小店主打純素甜品，年輕店主獨力研發一系列目標係同一般甜品口感一樣嘅純素甜品。佢哋嘅純素馬卡龍經過改良後，口感跟一般無異，而且仲無咁甜同膩。而Tiramisu捲蛋，海綿蛋糕鬆軟，可可味濃郁，真係啱晒想食得健康啲嘅甜品迷～
►詳細介紹：以簡約美學呈現純素甜品 深水埗合舍小店「希望將純素甜品變得更好食」
純素Bagel 404 Plant
近期， Bagel都係大熱食品之一。呢間上環嘅純素Cafe就有提供每日新鮮自家製嘅純素Bagel，煙韌有嚼勁。大家仲可以配搭唔同嘅夾層或者醬料，將佢變成甜食或鹹食。私心推介佢哋嘅Triple Biscoff Bagel，Bagel加上純素CreamCheese、Biscoff醬、Biscoff餅乾碎，再加一塊Biscoff餅乾，唔會太甜膩又有咬口。
►詳細介紹：每日自家製Bagel 必試Biscoff醬口味+Bagel漢堡 上環新開純素Café
精緻素菜 素菲亞
餐廳裝修走清新田園風格，令人感覺放鬆，旨在塑造一個空間畀素食同非素食者都可以一齊享受。菜式十分精緻，材料同烹調手法配合得天衣無縫，唔講都唔知係素食。佢哋嘅素魚用黃豆製作，外面包一層紫菜再炸，完全模仿魚皮嘅口感，外脆內軟。
►詳細介紹：西環新開摩登素食餐廳 必試芝心豆腐漢堡+精緻紅咖喱魚
文: Hailey
相、片：Calvin Kwok、Tom Li、Cathy
