Hygge (已結業)

男朋友放工嚟接我，帶我去咗荃灣食dinner，今次去咗荃灣廣場附近嘅一間西餐小店，食飽仲可以行埋街添！一入到嚟覺得環境都算舒服，見到餐牌上好多菜式都好吸引，我哋決定咗叫龍蝦湯、鮮蝦沙律、松露雜菌忌廉汁意粉、香煎波士頓龍蝦配牛腹肉同埋伯爵茶布甸。先嚟嘅係番茄龍蝦湯，味道好香濃，面頭嘅多士浸左湯一齊食味道好好，湯頭唔會好腥，夠熱，配上麵包幾夾！鮮蝦沙律，不過不失，蝦肉都幾大隻，有少少酸酸地嘅醬汁都幾開胃清新。松露雜菌忌廉汁意粉，賣相一般，但係份量幾多，因為啱啱煮好咗就上菜，所以好夠熱！一嚟到有好香嘅松露味，啲菇都切得幾大粒，增加咗口感，唔錯！香煎波士頓龍蝦配牛腹肉，龍蝦望落就大隻，但係蝦肉就小咗啲。牛腹肉3成熟，幾香牛味，亦都唔韌，幾唔錯！旁邊仲有原個蒜頭同半個燒番茄。伯爵茶布甸差唔多每一枱都必點，賣相都幾靚，仲有少少玫瑰花瓣同糖漿伴碟。但係食落就有啲扣分，因為面頭嘅糖漿真係太甜啦！就咁伯爵茶布甸都已經夠晒~最後叫咗2杯嘢飲，檸檬蜜桃梳打同蜜糖生薑茶。前者有啲似退燒藥味，後者就幾好飲，薑味都幾香。