博多拉麵別天神

營業中

休息中

好耐無食過拉麵啦！之前北角都有一間博多拉麵別天神，但最近執咗，為咗重拾佢嘅味道，我決定去佢嘅另一分店：銅鑼灣告士打道鋪。但係，一去到門口就打咗個突，因為店面俾我想像中細勁多，如果要走到店鋪最入嘅座位，就算再瘦嘅人都要「縮起個肚、舉高個袋」先可以入到(出嚟嗰陣挺住個滿載而歸嘅肚，難度應該再高啲)......食個拉麵姐，都要過五關斬六將咁......我嗌咗一客蝦味噌套餐，配日式餃子。拉麵嚟講，湯底一如既往嘅好味，濃郁得嚟又唔會過咸；叉燒軟嫩，溏心蛋入口即溶，配菜又恰如其分地吊到味，唔會喧賓奪主；最特別係放喺中間嘅櫻花蝦，鮮艷奪目，為呢碗拉麵加唔少賣相分！至於日式餃子就相對普通，我嫌佢淋得濟，只可以用不過不失嚟形容。服務方面，店內只有一男一女店員，見佢地全程都默默做無停手，對客人態度良好，既勤快又有禮，值得一讚！整體嚟講，除卻店內環境過於狹窄之外，食物質素同服務都好好，值得一試(再試)！