影片
更多
2019-10-27
1021 瀏覽
呢日同呀媽去鰂魚涌怪獸大廈打卡，順便搵啲嘢食，由於早餐食得多，所以唔想食咁飽。見到東匯中心個水牌有間粥店，就一於去試下，個位置喺堆住宅後方，市政大廈街市對面。一入到去就有寧靜社區小店嘅感覺，環境算幾乾淨企理，坐位唔多，但不斷都有街坊入嚟食碗粥🥣或買外賣，我偷聽街坊同店員嘅對話，覺得應該係由一對母子經營，媽媽就負責煮，仔就樓面，佢地都好好禮貌好親切。我哋一人要咗一碗粥，分別係自製豬肉丸粥($31)同蠔豉皮蛋瘦肉粥($38)。兩碗粥都有少量蔥同薑絲，粥底夠綿，好多料，味道就唔係好濃，落少少胡椒粉🧂會好啲，不過可以肯定嘅係佢無落味精。而有兩樣嘢好抵讚，第一係蠔豉好大隻好鮮，第二係豬肉丸好好味，口感夠彈牙，入面仲好似有啲馬蹄粒令到佢好爽，肉丸有成6粒唔會唔夠喉👍。我哋加咗$10要咗條油炸鬼，ok啦啱配粥嘛，佢幫我哋剪開咗一嚿嚿。本身其實想要牛脷酥，不過賣晒，可能已經係晏晝啦。另外仲要咗碟叉燒腸粉$16🥢，有3條，味道唔錯，熱辣辣送上，唔係好滑嗰種，但都幾薄幾有米香，又有唔少叉燒粒。總括嚟講，呢到真係充滿街坊小店嘅味道，成個感覺無平日連鎖店咁公式化，粥品雖稱不上非常驚艷，但都好食，價錢亦屬大眾化
呢日同呀媽去鰂魚涌怪獸大廈打卡，順便搵啲嘢食，由於早餐食得多，所以唔想食咁飽。見到東匯中心個水牌有間粥店，就一於去試下，個位置喺堆住宅後方，市政大廈街市對面。
一入到去就有寧靜社區小店嘅感覺，環境算幾乾淨企理，坐位唔多，但不斷都有街坊入嚟食碗粥🥣或買外賣，我偷聽街坊同店員嘅對話，覺得應該係由一對母子經營，媽媽就負責煮，仔就樓面，佢地都好好禮貌好親切。
我哋一人要咗一碗粥，分別係自製豬肉丸粥($31)同蠔豉皮蛋瘦肉粥($38)。兩碗粥都有少量蔥同薑絲，粥底夠綿，好多料，味道就唔係好濃，落少少胡椒粉🧂會好啲，不過可以肯定嘅係佢無落味精。而有兩樣嘢好抵讚，第一係蠔豉好大隻好鮮，第二係豬肉丸好好味，口感夠彈牙，入面仲好似有啲馬蹄粒令到佢好爽，肉丸有成6粒唔會唔夠喉👍。
我哋加咗$10要咗條油炸鬼，ok啦啱配粥嘛，佢幫我哋剪開咗一嚿嚿。本身其實想要牛脷酥，不過賣晒，可能已經係晏晝啦。另外仲要咗碟叉燒腸粉$16🥢，有3條，味道唔錯，熱辣辣送上，唔係好滑嗰種，但都幾薄幾有米香，又有唔少叉燒粒。
總括嚟講，呢到真係充滿街坊小店嘅味道，成個感覺無平日連鎖店咁公式化，粥品雖稱不上非常驚艷，但都好食，價錢亦屬大眾化😊，簡簡單單喺到開餐都唔錯啊。
張貼
