水上人魚蛋粉 (已結業)

今時今日，雖然四處都話有疫情價，但總是百物騰貴，就連連鎖店都不知不覺地加價，身為平民的我們，當然要精打細算一下啦！如果大家經過屯門碼頭區，除了可選擇蝴蝶商場內的食店外，也可選擇一條馬路之隔的美樂花園食店，讓自己多一份選擇吧！今天我要為大家介紹的是一間開設於美樂花園的《水上人魚蛋粉》。帶著爸媽吃下午茶，當然，他們總不想天天吃連鎖店，所以，心血來潮突想吃一碗粉麵呢！為何我們選這間？是因為在屯門碼頭區，眾多吃粉麵的店舖中，這間總算是地方較大較整潔，而且枱與枱之間的距離算是最大的一間呢！這個時勢，這個考慮因素都很重要呢！此外，我覺得這間的性價比也都算不錯呢！讓我為大家介紹一下吧！當天，我們吃的是下午茶，所以只要點選了一碗粉麵($30起)，加$3就有凍熱飲品／罐裝汽水，而特飲則只需＋$5，想加碟油菜都只是＋$8。 《原汁牛雜河》($31) 這裡的牛雜河真的不錯，份量偏多，大約每款一至兩件。清潔乾淨，這是食內臟時，特別要注重的因素呢！湯汁味道適中，不會太淡或太鹹，加上新鮮翠綠的蔥花，以湯匙盛載著，使食用者食時才把蔥花浸湯，令蔥花可依食用者的喜好而控制於最喜歡的生熟度，吃到最喜歡的味道。餸放得整整齊

要知道,而家要食一碗正經潮洲粉麵,真係好難,坊間麵檔啲豬手,成日硬硼硼,呢間係炆到夠身夠淋的款式,我最鍾意。魚蛋都係潮州白魚旦,唔死實,稍淋,但好有魚味。湯底唔係坊間清如水,淡如雪的所謂"清湯",係大地魚湯+足量的豬手汁,搞到個湯有少少起膠,正~連凍啡先$40蚊(早餐),梗係唔貴啦,好過食求很其煎雙蛋+雪菜隱形肉c公仔麵多多聲啦。好唔好食?呢幅相話你知,clear呀!你睇d河粉係正式水粉,正正宗宗潮州粉,我已成為呢間店的鐵粉:XD

我係常客一星期黎一次左右魚蛋粉買少見少呢檔算好味又抵食$33一碗連飲品去邊搵？魚皮唔係薄到紙果啲好脆好香口魚蛋彈牙湯底出色地方夠大又算乾淨唔太明點解仲有人俾負評推薦

星期二下午六點走進店面，裝修新，地方大，看過去干淨整潔，店員很有禮貌，上餐也快點了一碗牛雜河＋通菜腐乳，牛雜爽口，水灼通菜點上店家腐乳，入口讓貝蕾都蘇醒了。一定點讚👍

去開蝴蝶中銀搞戶口野，要等粒半鐘，於是去附近食野，睇勻最後食呢間水上人。一入去落完order阿姐即好心提醒早餐時段就過，而家落單加野飲平少少。反正天氣悶熱，要多杯凍齋啡走甜。食物就叫左個紫菜湯同剩雲吞。雲吞方面香港人食慣多蝦少肉，呢間係比較肉多，但基本都滿意！紫菜湯完全合我口味，坊間普遍湯底咸，但呢間就幾清幾口味。食完野埋單走人，番中銀繼續呆等，等等下先發現，X街啦，漏左個袋！即刻九秒九番去啦！好彩，店家一早幫我keep好左！第一次食感覺的確唔錯！會再幫襯！最後，環境感覺好舒適干淨！希望可以繼續保持

一開始見佢個名係水上人咩咩咩，緊係食魚蛋魚片嗰啲啦，都ok嘅，不過冇令人留下深刻嘅印象。之後俾多次機會佢，食左個豬手面，都係普通，冇咩特別。有一排冇食佢lu~有次收工好夜下，得返佢開門，咪求其食。因為之前食嗰d都唔太特別，就脆脆地食左個牛腩面，嘩！好好食！啲腩比外面嗰啲肥，不過好濃牛味！一碗有成五六件牛腩，好抵食囉。不過其實一個人食晒有dd"漏",所以通常都係2個人去，開心share,總之次次去都係食牛腩魚片頭面另外，啲伙記都好好禮貌。

今日收工有啲心血來潮想食牛雜米，想起屋企附近有間水上人魚蛋粉， 聽聞好出名有三四間分店， 咁梗係要去試下佢有幾水上人嘅魚蛋粉啦。 好啦首先一入到去門面都幾乾淨，地方又大，啲枱嘅分隔 空間 非常之充足， 我嗌咗碗牛雜米，我老婆嗌咗碗牛筋魚蛋米， 另外嗌咗個炸魚皮細嘅， 仲有碟蠔油生菜。 呢度啲侍應都好細心， 我唔明白佢嘅收費單佢好有心機咁同我解釋。 好啦到主角出場喇， 我先食佢個牛雜 ……就真係唔係好掂囉，啲牛腸唔知係唔係未通乾淨好臭好似食緊屎咁 ，啲牛腩汁一啲味都冇。 我老婆係個牛筋魚蛋米， 啲牛筋就真係好筋好似橡筋。魚蛋都還可以，但係啲菜唔知點解有啲白色嘅汁喺度唔知咩嚟， 全場最好食應該係個炸魚啦， 但係唔知點解食完有啲乸喉。 總括嚟講我覺得水上人應該都係返上船啦。 (唔記得影相食左一半)

呢間野都算新開，比較少人，諗住清清地同病人食碗魚蛋粉，而我就順口叫碗牛腩麵食算，真係有驚喜！6舊牛腩居然超肥！1/4係肉，其他係超肥膏！！！嚇我一跳！根本稱不上牛腩，明明係肥膏麵，牛筋都唔係真係好無奈⋯⋯我唔敢食，本來想同店員講下換唔換得，但被友人阻止，見到店員個個行行企企，又有紋身，唔知點解個心有點不安，我承認我地怕事，都係唔敢開口了⋯⋯睇下碗麵食得幾多得幾多啦⋯⋯一陣返屋企搵d零食食下先！後記：我臨走時，見到隔離枱黎左碗牛腩麵，都係肥肉多，即時對佢報以一個無奈眼神I know that feel ,sis/bro!不過溫馨提示一下：如果局住黎，我覺得一定要食魚蛋/魚片粉麵，唔會咁易中伏！祝福大家！～～～食剩都係肥膏遠睇明明似正常⋯⋯近睇真係肥膏多過肉，半肥瘦都好吖，咁肥點食!

一間開了好幾個月的店？因不就腳，總是不會想到要到這兒吃碗粉麵。今晚一家三口來吃個便餐，要了牛雜麵、魚蛋麵及魚蛋河，另加芥蘭、雞翼尖、炸魚皮、熱檸水及一罐可樂。成為$122。我不吃牛，所以牛雜麵品質無可奉告。但招牌魚蛋的確唔錯，軟軟爽爽的，味道亦標準。湯底濃度剛好，不會太鹹。蔥蒜芫茜都是放在勺子上，不想要的話可以全數過檔到爸爸碗內。油菜的芥蘭誠意十足，嫩嫩的揀手貨，吃起來像是剛灼熟的，非常爽脆。雞翼尖夠淋，亦入味，有滷水香，上枱時是暖暖的，仲同時擺上一隻用嚟放骨嘅碗仔，夠晒細心，而且枱面亦都會更乾淨。炸魚皮很鬆脆，食落覺得好新鮮。$8一小碗，其實份量已足夠。呢度嘅枱擺得好疏落，係我食過咁多間魚蛋粉店，空間感最強嘅一間。呢度嘅侍應，既年青亦有活力，人客一入店，就立即招呼人家坐低，表現熱誠，值得嘉許。

今朝湊完百厭仔返學,  兩公婆就去試新嘢.  呢個舖前身係佳寶凍肉孖舖,  無柱位, 光猛闊落, 但可能我哋去幫襯嘅時間尚早, 就更顯得冷清.呢度主打魚蛋粉, 當然要試下佢嘅招牌手唧魚蛋啦! 手唧魚蛋米粉+腩汁 $29.00--魚蛋有鮮味, 係比較林身果款, 唔係爽口果款, 都唔錯. 唔知係腩汁問題定佢原本湯底係咁, 目測係有啲辣油咁嘅, 入口微辣.手唧魚蛋拼手打牛丸米粉 $35.00 (雙拼加$6.00)--手打牛丸非常爽口雞翼尖一份 $6.00-- 係滷水翼尖, 夠林夠入味凍檸檬茶 / 熱檸檬水 (早餐時段凍熱飲品加$2.00)埋單$74.00

在屯門美樂新開冇耐，地方很濶大，魚旦河河粉很滑，29元一碗，魚旦有鲜味，湯底好，冇乜味精。加冷熱飲品六元。细魚皮8元，魚皮好食，早上06:30-11:00及14:30-1700,饮品加2元，很抵。下次来試其它食物。