南小館 (青衣城2)

營業中

休息中

放假周圍多人，見呢間有位就試下。交左點心紙之後店員入完單擺低一句「無酸辣湯」就走左，8點就無有點失望。四小碟： 木耳無味，好在有口水雞汁可以撈下。口水雞都幾嫩滑，味道唔錯。蔥油拌面： 見貼晒相好似好推介，叫一碟試下，結果上到黎我地都唔知黑色一條條係咩黎，原來係蔥！ 成碟野除左咸完全食唔出蔥既香味，0分。小蘢包： 皮厚，個預摺位直頭都未蒸透….最後， 服務方面覺得都係麻麻，一坐低杯茶根本唔熱既，飲晒好耐都無人加茶，但間舖無乜客人，所以加一服務費都唔知服務左咩⋯食完之後好明白點解間舖大量吉位～

自從搬左黎青衣住之後，我經常都會黎依度食飯，餐廳既環境保留上海風味，員工亦親切有禮。另外，餐廳的食物質數也很高 。今日我就order左蔥油餅，小籠包同埋炒年糕。我特別推薦依度既蔥油餅，咬落去口感酥軟，加上蔥花撲鼻的香味，實在令人停唔到口。小籠包方面，外皮製作夠薄，夾起亦不易散爛，而湯汁之中更有淡淡既鮮味。最後就係上海炒年糕，年糕軟糯，有鑊氣得黎唔算多油，唯一不足就係份量較少。希望餐廳會推出更多有特色既上海菜同保持依份獨有既上海味道。

青衣城8:16左右到等糖醋咕嚕肉 上海粗炒出塲等到尾9點 要求取消 最終出黎的粗炒失去食慾👎🏻上海粗炒 冇肉絲 菜又老🙅🏻🙅🏻‍♂️🤦🏽🤦🏻‍♀️細碟

不知所謂既餐廳。不知道為什麼屋企人會想食呢間嘢。今日第二次黎。一向態度都係好差，試過屋企人門口問下嘢，後面完全無人排隊，個門口侍應「入唔入架你」。有無必要呀，爭你錢咩。今日仲正。點左個酸菜魚。自問係酸菜魚愛好者，去邊間餐廳有都會點黎試下。但我係從來未試過係個酸菜魚上面見到有泡。我之前只係屋企臭左個煲湯到見過呢啲泡。聞落個湯臭既。叫其他人聞，都聞到臭。問侍應，堅持話係呢個味。算，費事討論，我退左佢。個侍應話一向都係咁，我話我上次食唔係，佢話係咪好耐之前，最近轉左湯。講真，酸菜魚係咩味，食開都知，你可以轉成點。我話「最近先食過。唔重要你退左佢」，佢話「退咪退囉，唔使講咁多」。大姐，我叫你退，你要拗，拗完叫人唔好講野，你係咪有問題？你係咪以為我係你啲同事。就算你係老闆，話曬都係客，咩態度。激氣到相都唔記得影。睇住個我寧願掉都唔放入口既薯粉先。食物完全唔好食，無論服務同食物仲衰過好多茶記，偏偏又唔係平。完全唔明白佢存在既必要。

難得同屋企人出街食飯慶祝中秋節，選擇了青衣城的南小館。從等位到進食員工都十分有禮貌，亦都很細心。然後食物質素都正正常常，當中乳鴿十分之抵食，只需29蚊。最後成餐飯的體驗都不錯，有個愉快的中秋節。

放假去試下呢間 可能平日同d人食lunch 出面好多人排隊 等咗一段時間入去 午餐價錢唔貴 麵餐都係40幾50 我叫個擔擔麵加小籠包食 仲有杯豆漿個擔麵色睇落似茄湯 食落就係辣辣地 未到食唔到 但係爽 小籠包3件熱熱地 配起上黎好食

晚餐來吃 , 晚市只等了15分鍾, 很快可以入席不錯. 生煎包咬下去爆汁, 真材實料.一定會回頭吃.唯獨上海粗炒豉油太多,偏咸了一點, 向店員反映後瞬速換了一碟比較清淡,不錯!

招牌小龍包d湯唔錯 幾好食 塊皮薄睇到d肉粉粉地 會夾穿都情有可原 回鍋肉都好食 送飯一流 係肥左少少同油多 因為叫 lunch set 價錢80算係咁上下 有餸有飯有嘢飲 散叫就貴咗d lo

南小館我有食過其他分店，感覺都好好。今次食青衣城分店，真是嬲住食。一入門時，員工叫我攞籌態度已經無禮貌，入到餐廳問員工問題無回應，食了全程無加茶。雖然食物質素一般，但心情都好影響食慾，下次唔會再食。

酸菜魚一般般，沒有很驚艷，個人覺得只有酸味，沒有別的味道。京醬肉絲，跟圖片完全不符，吃起來的口感也不像肉，總之不推薦！鮮肉小籠包🉑️，是好吃的，很鮮美，湯汁很好喝。

很久沒有到青衣城商場，巧合老友相約到青衣城「南小館」下午茶。此行下午茶11位共聚，原意請食肆安排兩枱，但店方祇安排6人、3人、2人共三枱。我與老友兩人一枱共享簡單一位下午茶$48：主食我選蝦肉餛飩湯麵，麵質很腍帶微微梘水味，並不是我喜歡的麵質，蝦肉餛飩味道一般。小食我楝豬肉小籠包，算是今次下午茶最好吃，皮薄、饀料可口，多湯汁。特價$29紅燒乳鴿， 暖暖的、味道頗不錯，可能特價，椒鹽與香醋欠奉。配甜品$15椰香紅棗糕，一口甜品，少許煙靭口感、少甜，不感覺到椰香。$6一位茶水，很清晰的玄米茶可免費添加。連加一小費，人均消費$51後記，服務態度差強人意，食品質素一般，用餐體驗不愉快，都不會再臨。

我不嬲都懶得打食評，但今次真係唔打唔得放左工見肚餓想去食少少野路過見到南小館,諗住之前都食過都覺得正正常常，又好耐冇食過，就去幫趁下喇，點知依家係差到一個點食左個下午茶餐2隻鮮肉小籠包加一個蔥油開洋伴麵，再加左個小食韮菜鮮蝦盒子,真係垃圾到不行3樣野冇一樣得一、2隻小籠包痴埋左，一夾就穿都算二、個伴麵一夾，成個麵餅咁，好難先可以打散三、個韮菜鮮蝦盒子，個底油淋淋，淋哂，一啲都唔脆真係食到好谷氣，永不錄用

午餐黎到南小館，1點等到1點20先入到，嗌左個酸辣面加小籠包，一支雪碧。。。酸辣面一夾就夾左一大舊糊左嘅面，食飯時間都唔夠連投訴都趕唔切，食到尾支雪碧仲未黎，3催4請先請到返黎。。。咁就67蚊，唉！

嚟到青衣行完山 ⛰️咁就同朋友嚟呢間～（因為家姐之前食過 覺得幾好食 所以推介）所以叫咗乳鴿、水煮魚、炒米粉～一嚟到見到乳鴿咁抵 咁就即刻一人叫一隻！呢個乳鴿幾好～好食、熱辣辣～😋😋同埋欣賞佢係個皮好薄脆 裏面好多汁 💦調味方面啱啱好 啲乳鴿好嫩 真係好好食呀！想食多隻嘅 不過一人一隻啱啱好😎不過朋友話唔夠大隻 跟住我話你要大隻啲不如食燒鴨🙈諗住食下水煮魚 點知一挾 原來係水煮牛但我明明冇叫牛 所以叫人幫我換 咁就食個米粉先～米粉呢⋯係淋 碎濕濕嘅米粉⋯⋯ 唔係我想食硬身 爽嘅米粉⋯就覺得麻麻地 味道正常 不過粉質唔係我預期之內見到個水煮魚！好大盆喎！好似好正～ 一食落去⋯啲魚呀⋯⋯😓😓😓完全係有啲失望😞因為呢個魚有少少奇怪 講唔出嘅奇怪 🤨反正個魚質唔好食 個水煮底個味係幾好嘅見到隔離枱有盤炸嘢 好似幾好食 😜望吓個菜單 原來係炸雞翼之類嘅嘢 呢度嘅炸物都幾好 唔錯 熱辣辣～最終食咗兩件 仲有四件 咁就朋友頂埋佢啦！哈哈 個味道似牛油雞翼買單$399跟住一個月內咗過嚟就85折～咁如果下次過嚟青衣就同家姐一齊食啦 嘻嘻😁

之前食過葵芳果間印象不錯，見唔洗排隊就入左去醫肚。食物質素差左。店員素質亦有待加強， 冇禮貌，態度差，十問九唔應。咁多劣評唔係冇原因，真係好難令人番轉頭🙄。紅燒乳鴿💰💲29皮炸得唔夠脆，偏油。肉質榎歰歰，小失望，真係一分錢一分貨。醬爆腰果雞丁💰💲78雞粒好似白烚咁，冇鑊氣，再沾上甜甜酸酸既醬，感覺唔太夾。好彩腰果仲係脆口既😑。鮮肉小籠包💰💲45外皮小厚唔夠薄身。豬肉餡料分量適中、軟腍，湯汁多尚算鮮味。招牌炒飯💰💲88用左蝦醬、豆瓣醬炒成，味道偏濃，餡料唔多，普普通通。