lunch經過食個pho, 真係無奈到爆。 生牛肉金邊粉，唔好話要求牛肉湯底，連味都無！只係白烚肥牛粉！要落咗檯面半支辣醋先有味，但就邊咗撈濛囉。生牛？係邊呀？係雪櫃呀？跟本就係全熟佳佬肥牛片。上檯完全無是拉差，海鮮醬，指天椒，青檸，或九層塔，芽菜在碗內。 完全港式，呃人無食過pho呀？唔識做你就唔好叫自己做越式餐廳啦。 $38 一碗粉+凍ot完全唔貴，但不如你收鬼貴d比碗正常嘅pho我啦？d野仲差過茶記，請都唔食！ 服務方面，無服務，無投訴。

兩個人，一人叫咗一碗生牛河，味道一般，完全唔覺得有咩咁值得攞車軚人星星。
叫咗個小食拼盤，兩個人碗粉食到8成追咗一次，阿姐check都唔洗check就話整緊。後來碗粉食完再等5分鐘再追，又話炸嘢要耐d. 再等咗5分鐘都無上，決定叫埋單，阿姐先叫入廚房問個小食拼盤有無落單 - 咁就梗係無啦！ 咁當然就係埋單走人啦！
然後臨走阿姐仲要補多句，又話要又唔要，玩嘢呀？！
咁嘅服務質素，比條車軚都無用啦，可況根本就唔好食！

一行4人，book咗檯，一位朋友未到，人齊先入得。
入到去，地方極迫狹，一人一個手袋都要攬住。
點餐：
兩個酥皮湯 - 唔錯
兩個蘑菇湯 - 非忌廉，好多菇，好香菇味但味道中式(冬菇味好出); 跟湯塊包，林自自條條fing, 但甜甜地幾好食。
黑松露闊條麵 - 闊條收咗身，完全睇唔出。麵條極碎上，share無難度。未食過咁淡松露味嘅松露菜，極環保。
菠菜千層麵 - 好多芝士，菠菜亦多，有d膩，但滿意。
帶子西班牙飯 - 最穩陣的一味
小菜雞亦 - 好脆，無特別，多舊嘢咬下，可以唔叫
小菜芝士薯條 - 份量好大，邊焗得好硬朴朴聲，個心林自自一pat, 芝士好鹹唔香，可以唔叫
藍莓冰茶 - 幾好但唔夠甜
最後，係豬仔骨。張檯放滿咗，碟嘢攞到埋嚟無位擺，悔氣，企係度等，碟嘢仲要晾喺我膊頭借力，死企係度唔郁等我哋去執個位比佢。最後根本唔位可執，叫佢一陣先上，即時黑面衝入去掉低。
上菜你固定在我地後面兩人之間上菜無問題，點解一時又後面，一時又側邊，重要係咁鏟我個胸？
最後豬仔骨有位上，極細size, 仲要七成熟，切開滲血水。豬嚟架，你與其趕上菜又無位擺，不如你用果d時間煮到熟透啦唔該？
係咪在MK根本唔應該有要求？ 咁你個價錢都唔應該對我有要求囉！

我曾經話過，如果我就嚟死，最想做嘅就係食碗牛腩河；可想而知在下對腩河鋪癮有幾深。
以前住北角，幫襯過一次後將北角道分店定為飯堂：大件夾抵食，腩鬆化而爽，牛味濃，多數走青的我此店必定多青 - 蔥，芫荽，唐芹，炸蒜毫不吝嗇；魚湯夠鮮，唔食河食麵亦爽彈無炸型。另一必叫係茶 - 茶底難得地香，直頭華一聲。
搬到深水埗後，最近在北河街開分店，開心得我！二話不說去回味一下。幫襯三次，水準飄忽。。。唔係，係一次比一次差，魚湯竟然可以係啡色，味道好明顯係腩汁加水；最後一次，我食剩飲剩相中咁多，再涯不下去 - 腩同湯底完全無腩味，味道錯晒，腩老，韌，河粉斷晒, 最好玩係杯檸茶 - 正露丸咁嘅味。
特許經營嗎？有無差得咁遠呀？無心做咪唔好做囉，做衰晒個名。

本人唔係一位拉麵fan, 但因為另一半中食拉麵，所以好多時都半推半就。
唯有呢間，令我愛上拉麵，令我食完再食；又或者，只有佢地嘅拉麵令我愛上。
傳統地，餐牌只有幾款必備湯底，但每款都好滿足，無一款會有"硬係差dd"嘅感覺。另外最吸引嘅係限定天王 - 試過櫻花蝦，胡椒，同蒜，基本上每款嘅主題味道都非常突出，用料十足，已經講唔出要點樣先會更好，可以話係一百分。
作為蛋精嘅我地，日式糖心蛋必食；蛋唔算特別出色，但絕對滿意。
另一款精品係豚角燒：香濃，鬆化。對於認為生命中可以無豬肉嘅我，此為必食之選。
除咗餐牌上嘅精品，另一樣不得不提嘅係你意想不到的：水。檯面每一壺水都有檸檬片，清香消滯。
裝修簡潔，但食品制作非常用心，一間絕對一百分嘅食肆。

兩個人，星期五食晚飯。
點菜如下：
台式晚餐-
魚湯鮮蔬 - 湯無魚味，只有薑味
糖心蛋 - 有dd咁多多太熟，但回味無窮，可惜墊底菜好爛
胡椒炒牛肉 配 白飯 - 茶記質地
洛神山楂蘋果茶 - 唔錯
牛肉麵 - 麵質硬，但湯底，肉，菜都好正
麻辣牛舌 - 只麻辣無鹹味，配菜好爛
珍珠奶茶 - 唔夠甜，珍珠硬
creme brulee - 正，濃香，焦糖唔夠厚

話說，先上菜同糖心蛋。唔知做乜求其到咁，碟邊痴住唔屬於碟菜嘅汁同菜渣又唔抹碟，d墊底菜仲黑晒頭，好爛下。
跟住上個牛舌。味道上面講咗，同樣地，d菜黑晒頭霉晒，做咩呢？
再上牛肉麵，真係唔錯。約25分鐘後，個牛肉麵食到8成，另一個餐終於上菜。點知，落錯單，於是又要再等過。
胡椒炒牛肉，茶記質地，最差嘅所謂台式菜。
麵一早食晒，飯就食到8成。同行叫waiter上埋甜品，肥仔經理就只顧自己食飯，見到我地入手都唔叫人，當睇唔到。然後，waiter就比張單我哋。。。再過一陣問我哋係咪上甜品，係，然後我手上仲揸住碗筷，飯都未爬完，就收晒我d餸。
唔係好夜，鋪頭仲好多客，就開始在廳面用滾水加清潔劑浸毛巾，我哋就只好陣陣飄香撈飯。
找數，卡機壞。
到底我地做錯d乜嘢？！

兩個重口味人士，係電視見到厚牛舌同撈麵好正，慕名而來，點知中伏到爆。
明知自己重口味，所以無叫鹽味湯底，因食評話無味。點菜如下：
厚燒牛舌
撈麵
味噌叉燒湯麵

先上牛舌。真係好肥美，口感似鵝肝，但乜嘢汁都無點，都鹹到苦。叫個waiter過來問一問，佢話係咁架wor~
再上撈麵，湯未上。食咗一啖，鹹到想死，但成70幾蚊，每一啖都覺得涯下去，每一啖都掙扎，70幾蚊犧牲個腎值唔值得？？？湯終於上了！救星到！好在個湯係一d味都無，先可以當沾麵咁食，洗洗個麵！
同行味噌叉燒湯麵，終於唔會太鹹，但一d都唔好食，湯無味噌味，叉燒質哋差，最慘係個糖心蛋，蛋黃太熟，個味錯晒，只係一隻滷水蛋囉！碗麵乜都無加都要$100, 仲咁嘅質素，比番小小良心啦唔該。
埋單後每人要狂隊兩支水先鎮得住度鹹氣。
想洗腎咪幫襯下囉。

一行四人食晚飯，7點入座，9點仲追緊上菜，叫咗以下幾樣：
$1雞
菇沙律
凍番茄
海踅
黑松露奶奶雞麵
炒飯

凍番茄：甜到漏
菇沙律：ok
海踅：超鹹
麵：好食，黑松露味濃，雞滑，麵質彈
炒飯：ok
$1雞：凡每人消費$50或以上可以$1 order一份奶奶雞。上面黑松露奶奶雞為3人份量，$1雞約一人份，原味。

7點入座，d嘢食到8成，追個一蚊雞話無落單，問我哋等唔等。
一直等一直見住周圍d雞上檯，追咗3次都未到我哋。後來就有位阿嬸報告話整緊。我哋話等咗超過半個鐘啦wor! 佢話，其他客人都要等9個字。老人家勞氣了：9個字？格離遲過我哋落單都上咗菜啦！e位阿嬸就一路行開一路啤住我家長者。其實你上唔切咪沙個冧行開囉，唔想做咪摺咗佢囉，e d咩服務態度呀？你上菜慢我哋欠咗你呀？
等足9個字再追，都係無。最後差唔多9點半先上菜。
一個晚飯食成三個幾鐘，找數仲話卡機壞咗只收cash.
你無心做就摺撚咗佢，唔好扮晒蟹又e樣優惠果樣優惠，服務態度又差，一句講晒無下次！

之前晚上去過E間野，係間BAR，想唔到日頭係另一回事。

團購五十幾蚊有個lunch/ tea, 咁就買兩張試下。
3pm 上到去，只得我地兩位。
先來頭盆 - 又瘦又污糟GE生蠔兩隻。一月比南非蠔你食就當然瘦到無朋友，但瘦唔緊要，點都唔應該有泥係蠔肉上面掛?
沙律 - 酒BAR nuts 兜仔size, 最慘係D菜又乾又謝，在家煮飯一早就掉左，咁都仲可以比客食，仲要有一舊發霉!
:湯 - 開罐意粉醬倒落個碗度就食得。
主菜 - 得我地兩個客，整個意粉要超過半個鐘，以為乜野咁驚為天人，想唔到係一人一碟得掌心咁大份量GE意粉，味道更加唔好提，早知留番個意粉醬"湯"去撈無咁嬲!
:餐飲 - 熱檸茶，熱啡，算係唔錯。

既然無心做，又何苦做團購比個機會更多人試到D咁無水準GE野? 比個機會人地比劣評?
我諗佢地都係做番BAR好D。

一行八人用COUPON食個LUNCH，＄69一位再加一。
時間有兩段，1230-1330或1330-1430，極尷尬時段。
座位好似迴轉咁，八個人圍住個鐵板，每個位頭頂有射燈射住，八個人邊食邊滴汗！個鐵板仲要高過個檯面半呎，師傅一邊炒，D鹽就一邊由個板度跳落嚟。
上菜了，次序如下：
刺身四款，當大家用檯面嘅豉油差唔多食完先上個刺身豉油
無限添食嘅炒飯 - 成陣燶味，好乾好散，仲唔會比匙羹你，慢慢續粒夾啦！基本上真係唔需要refill了，食咗一啖就唔想食。
無限添飲味增湯 - 咸
鵝肝多士 - 唔錯，不過非常之油！
茶 - 唔係應該一開始就上咩?!
天婦羅三件 - 經刺身一役大家都耐心等待醬執，但最後都係要問先比你
鐵板菜+牛卷 - 唯一一件係同個板有關係嘅事。牛係一D味都無，連牛味都無
甜品 - 西瓜兩小片

總括來講，熱！唔好食！
個鋪位咁細點解要做鐵板？做鐵板點解要客人熱到滴汗？成個餐得一樣野係鐵板點解都要做鐵板？唔用COUPON要＄144就係食D咁嘅野，即係明呃＄啫?
如果可以唔出汗嘅話都有5-6分，E家最多係比3分！
試過就算，請我都唔會再去！